XALQ ŞAİRİ MƏMMƏD ARAZLA GÖRÜŞ
Bakı Dövlət Universitetində Azərbaycan ədəbiyyatının görkəmli nümayəndəsi, xalq şairi Məmməd Arazla görüş keçirilmişdir.
Professor və müəllim heyətinin, Milli Məclis deputatlarının, elm və mədəniyyət xadimlərinin, çoxsaylı tələbələrin iştirak etdiyi tədbirdə BDU-nun rektoru, MEA-nın müxbir üzvü Abel Məhərrəmov görüşü giriş sözü ilə açaraq, Məmməd Arazın geniş ədəbi və ictimai fəaliyyətindən danışdı, Prezident Heydər Əliyevin onun yaradıcılığına, şəxsiyyətinə daim qayğı və hörmətlə yanaşdığını vurğuladı. Sonra o, “Bakı Dövlət Universitetinin dünya şöhrətli məzunu” kitabını, xatirə nişanını və kollektivin hədiyyəsini şairə təqdim etdi.
Milli Məclisin elm və təhsil məsələləri daimi komissiyasının sədri Şahlar Əsgərov, akademik Budaq Budaqov, MEA-nın müxbir üzvü, professor Tofiq Hacıyev, Milli Məclisin deputatları Şamil Qurbanov, Zəlimxan Yaqub , BDU-nun filologiya fakültəsinin dekanı, professor Qara Namazov və başqaları ədəbiyyatımızın və mədəniyyətimizin inkişafında əvəzsiz xidmətləri olan Məmməd Arazın poeziyasının qüdrətindən, şairin vətənpərvər, insanpərvər şəxsiyyətindən danışdılar, ona ən xoş arzularını çatdırdılar.
Görüşdə tələbələrin ifasında şairin şerləri səsləndi.
Tədbirin sonunda Məmməd Araz özünün “Yol ayrıcında söhbət”, “Sənətdə son mənzil olmur” kitablarını BDU-ya hədiyyə etdi.
Bölmənin digər xəbərləri
