Aprelin 11-də Azərbaycan Respublikasının xarici işlər naziri Vilayət Quliyev ölkəmizdə rəsmi səfərdə olan İran İslam Respublikasının xarici işlər naziri Kamal Xərrazini və onun başçılıq etdiyi nümayəndə heyətinin üzvlərini qəbul etmişdir.

Vilayət Quliyev bu səfərin Azərbaycan ilə İran arasında dostluq münasibətlərinin möhkəmlənməsi üçün faydalı olacağını bildirmiş, ölkələrimizin əlaqələrinin genişlənməsi və əməkdaşlığın bir çox sahələrdə inkişaf etdirilməsində tərəflərin geniş potensiala və böyük imkanlara malik olduğunu vurğulamışdır.

Respublikamızın xarici siyasət idərəsinin başçısı Ermənistan-Azərbaycan, Dağlıq Qarabağ münaqişəsi məsələsində İranın həm ikitərəfli münasibətlər, həm də beynəlxalq təşkilatlar çərçivəsində Azərbaycanın mövqeyini dəstəklədiyini xüsusi qeyd etmiş, Xəzər dənizinin hüquqi statusunun müəyyən edilməsi məsələsində birgə səylərlə müsbət nəticələr əldə olunacağına ümid bəslədiyini bildirmişdir.

Cənab Kamal Xərrazi İran ilə Azərbaycan arasındakı dostluq münasibətlərinin və işgüzar əlaqələrin genişlənməsinə xüsusi əhəmiyyət verdiyini vurğulayaraq, iqtisadi sahədə əməkdaşlığın daha intensiv inkişaf etdirilməsinə tərəfdar olduğunu söyləmişdir. O, Dağlıq Qarabağ münaqişəsinə toxunaraq, bunun tezliklə sülh yolu ilə həll olunacağına vmid etdiyini vurğulamışdır.

Görüş zamanı qarşılıqlı maraq doğuran bir sıra məsələlər də müzakirə olunmuşdur.