SİYASƏT
XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Aprelin 12-də Azərbaycan Respublikasının xarici işlər naziri Vilayət Quliyev Vatikanın Azərbaycana təyin olunmuş nümayəndəsi apostol nunsisi Kiaudio Qucerottini qəbul etmişdir.
Vilayət Quliyev qonağı salamladıqdan sonra, onu yeni təyinatı münasibətilə təbrik etmiş və Azərbaycan xalqının hər zaman sivil ənənələrə rəğbət bəsləyən və öz dini dözümlülüyü ilə seçilən xalq olduğunu bildirmişdir.
Nazir Azərbaycandakı ictimai-siyasi vəziyyət, həyata keçirilən demokratik islahatlar, Ermənistan-Azərbaycan, Dağlıq Qarabağ münaqişəsinin həlli istiqamətində görülən işlər barədə qonağa ətraflı məlumat vermişdir.
Görüş zamanı Vilayət Quliyev, həmçinin, cari ilin may ayında Roma papası II İohann Pavelin Azərbaycana qarşıdan gələn səfərini yüksək qiymətləndirərək, bu səfərin Azərbaycanla Vatikan arasında diplomatik münasibətlər yaradılmasının 10-cu ildönümü ərəfəsində həyata keçiriləcəyini xüsusi vurğulamışdır.
ÖZ növbəsində Kiaudio Qucerotti diplomatik fəaliyyəti dövründə ölkələrimiz arasında mövcud olan dost və sıx münasibətlərin daha da inkişafı üçün var qüvvəsini əsirgəməyəcəyini vurğulayaraq, Roma papası II İohann Pavelin Azərbaycana səfərinin böyük əhəmiyyət daşıdığını və regionda sülhün bərqərar olmasına yardım edəcəyinə ümidvar olduğunu bildirmişdir.
Görüşün sonunda apostol nunsisi Kiaudio Qucerotti öz etimadnaməsinin surətini nazir Vilayət Quliyevə təqdim etmişdir.
Bölmənin digər xəbərləri
