SİYASƏT
XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Aprelin 15-də Azərbaycan Respublikasının Xarici işlər naziri Vilayət Quliyev ölkəmizdə səfərdə olan Pakistan İslam Respublikasının Müdafiə katibi Həmid Nəvaz Xanın başçılıq etdiyi nümayəndə heyətini qəbul etmişdir.
Qonaqları səmimi salamlayan nazir Vilayət Quliyev bu səfərin Azərbaycan ilə Pakistan arasında dostluq münasibətlərinin möhkəmlənməsi, ikitərəfli əlaqələrin genişlənməsi, o cümlədən hərbi sahədə əməkdaşlığın inkişaf etdirilməsi üçün faydalı olacağına ümid etdiyini bildirmişdir.
Söhbət zamanı nazir Vilayət Quliyev Ermənistan-Azərbaycan, Dağlıq Qarabağ münaqişəsinin həlli istiqamətində aparılan işlər, ATƏT-in Minsk qrupunun bu sahədə fəaliyyəti və qaçqınların ağır vəziyyəti barədə qonaqlara ətraflı məlumat vermişdir.
Pakistan İslam Respublikasının Müdafiə katibi Həmid Nəvaz Xan iki ölkə arasındakı münasibətlərin ənənəvi dostluq xarakteri daşıdığını söyləmiş və əlaqələrin daha da inkişafına tərəfdar olduğunu bildirmiş, ölkələrimizin müdafiə orqanları arasında da qarşılıqlı surətdə səmərəli əməkdaşlığın davam etdirilməsinə inamını ifadə etmişdir. Müdafiə katibi Həmid Nəvaz Xan Ermənistan - Azərbaycan, Dağlıq Qarabağ münaqişəsinə toxunaraq, bu problemin tezliklə sülh yolu ilə həll olunmasına ümid etdiyini vurğulamışdır.
Görüş zamanı qarşılıqlı maraq doğuran bir sıra digər məsələlər də müzakirə olunmuşdur.