Aprelin 9-da Azərbaycan Respublikasının xarici işlər naziri Vilayət Quliyev London şəhərində Kralıça-ana Elizabetin dəfn mərasimində iştirak etmişdir. Dəfn mərasimi başa çatdıqdan sonra nazir V.Quliyev Böyük Britaniyanın Xarici və Birlik İşləri üzrə dövlət katibi Cək Stronun təşkil etdiyi rəsmi qəbulda iştirak etmişdir.

Qəbul zamanı Vilayət Quliyev və Cək Stro Azərbaycan-Böyük Britaniya əməkdaşlığının daha da möhkəmləndirilməsi məsələləri barədə müzakirələr aparmışlar. V.Quliyev, həmçinin Böyük Britaniyanın Avropa İşləri üzrə naziri Ben Bredşo, Britaniya Lordlar Palatası sədrinin müavini və ticarət naziri baronessa Saymonsla da görüşərək, ölkələrimiz arasında mövcud olan iqtisadi əlaqələrin perspektivləri barədə fikir mübadiləsi aparmışdır.

Azərbaycanın xarici işlər naziri Böyük Britaniyanın Geniş Avropa üzrə naziri Con Makqreqor, xarici və birlik işləri üzrə ofisin Şərqi Avropa Departamentinin rəisi Saymon Bat ilə söhbət zamanı Ermənistan-Azərbaycan, Dağlıq Qarabağ münaqişəsinin sülh yolu ilə həll olunması, təhlükəsizlik, enerji və bir sıra digər sahələr üzrə ölkələrimizin əlaqələrinin daha da möhkəmləndirilməsi məsələləri barədə müzakirələr aparmışdır.

Tədbirlərdə Azərbaycan Respublikasının Böyük Britaniya və Şimali İrlandiya Birləşmiş Krallığındakı səfiri Rafael İbrahimov iştirak etmişdir.