Xocalı soyqırımı bölgələrdə kütləvi tədbirlərlə anılır
Ağsu, 25 fevral, AZƏRTAC
Xocalı soyqırımının 25-ci ildönümü ilə əlaqədar Ağsu Rayon İcra Hakimiyyətində anım tədbiri keçirilib.
AZƏRTAC xəbər verir ki, tədbir iştirakçıları əvvəlcə XX əsrin ən dəhşətli faciələrindən olan Xocalı qətliamına həsr edilən sənədli filmə baxıblar.
Rayon icra hakimiyyətinin başçısı Ənvər Seyidəliyev, eləcə də məruzə ilə çıxış edən icra hakimiyyəti başçısının müavini Sevil Mirzəliyeva bütövlükdə xalqımıza qarşı yönəldilən Xocalı soyqırımının öz qəddarlığı, qeyri-insani cəza üsulları ilə bəşər tarixində görünməmiş vəhşilik aktı olduğunu vurğulayıblar. Qeyd olunub ki, qətliam zamanı 613 nəfər xüsusi amansızlıqla və işgəncələrlə öldürülüb. Onların arasında 106 nəfər qadın, 63 nəfər uşaq, 70 nəfər qoca olub. 8 ailə tamamilə məhv edilib.
Xocalı sakini Əmrah Məmmədov tədbirdə dəhşətli faciədə yaşananlardan danışıb.
Çıxışlarda bu nahaq qanın yerdə qalmayacağı bildirilib.
X X X
Xalqımızın tarixinə qanla yazılan Xocalı soyqırımının 25-ci ildönümü ilə əlaqədar Şamaxıda faciə qurbanlarının xatirəsi anılıb.
AZƏRTAC xəbər verir ki, rayon icra hakimiyyətinin, hüquq-mühafizə orqanlarının, idarə, müəssisə və təşkilatların kollektivləri, ərazi icra nümayəndələri və ictimaiyyət nümayəndələri Soyqırımı abidəsini ziyarət edib, önünə tər çiçəklər düzüblər.
Şamaxı şəhər İncəsənət Təhsili Mərkəzində təşkil olunan tədbirdə iştirakçılar əvvəlcə Xocalı faciəsini əks etdirən rəsm sərgisinə baxıb, soyqırımı qurbanlarının xatirəsini bir dəqiqəlik sükutla yad ediblər.
Sonra 25 il əvvəl fevralın 25-dən 26-na keçən gecə erməni silahlı birləşmələrinin öz havadarlarının köməyi ilə Xocalıda törətdikləri soyqırımı, onun dəhşətləri barədə danışılıb. Vurğulanıb ki, aralarında qadınların, uşaqların, qocaların da olduğu 613 nəfərin amansızcasına qətlə yetirilməsi nəinki azərbaycanlılara, bəşəriyyətə qarşı ağır cinayətdir.
Tədbirdə Xocalı faciəsini əks etdirən “Xocalı qətliamı” adlı sənədli filmə baxılıb.
Sonda Şamaxı Dövlət Regional Kollecin tələbələrinin ifasında ədəbi-bədii kompozisiya nümayiş etdirilib.
X X X
İyirmi beş il əvvəl, 1992-ci il fevralın 25-dən 26-na keçən gecə amansız cinayətə əl atan erməni cəlladları dünyanın əzazil, qəddar və qaniçən insanları olduqlarını, terroru dövlət siyasətinə çevirdiklərini bir daha təsdiq etdilər.
AZƏRTAC xəbər verir ki, bu barədə Qobustan rayonunda Xocalı soyqırımının 25-ci ildönümünə həsr olunan anım mərasimində danışılıb.
Mərasim iştirakçıları əvvəlcə Şəhidlər xiyabanına gələrək, Vətən uğrunda canlarından keçən şəhidlərin xatirəsini ehtiramla yad ediblər.
Rayon icra hakimiyyətinin, idarə, müəssisə və təşkilat rəhbərlərinin, ictimaiyyət nümayəndələrinin, eləcə də rayonda məskunlaşan Xocalıdan olan məcburi köçkün və şəhid ailələrinin iştirak etdikləri tədbirdə XX əsrin ən dəhşətli cinayətlərindən sayılan Xocalı soyqırımı zamanı qətlə yetirilən həmvətənlərimizin və bütün şəhidlərimizin əziz xatirəsi bir dəqiqəlik sükutla anılıb.
Qobustan Rayon İcra Hakimiyyətinin başçısı Adil Məmmədov, eləcə də digər çıxış edənlər Xocalı faciəsinin dəhşətlərindən danışıb, xalqımızın tarixində ən qanlı hadisələrdən biri olan, erməni silahlı dəstələri tərəfindən soydaşlarımıza qarşı törədilən bu soyqırımı zamanı dinc əhalinin xüsusi qəddarlıqla qətlə yetirildiyini, əsir götürülən insanların isə dəhşətli işgəncələrə, zülm və təhqirlərə məruz qaldıqlarını diqqətə çatdırıblar.
Vurğulanıb ki, Xocalı soyqırımı haqqında həqiqətlərin dünya ictimaiyyətinə çatdırılması, bu faciəyə beynəlxalq miqyasda siyasi-hüquqi qiymətin verilməsi dövlət siyasətinin mühüm istiqamətini təşkil edir. Əminliklə vurğulanıb ki, Xocalı qətliamının təqsirkarları tezliklə haqlı cəzalarına çatacaq, Azərbaycan xalqının işğal altındakı torpaqları düşməndən azad ediləcək.
Anım mərasimində Xocalı soyqırımının dəhşətlərini əks etdirən ədəbi-bədii kompozisiya nümayiş olunub.
Tədbirdən sonra rayonda məskunlaşan Xocalıdan olan şəhid ailəsinə maddi yardım göstərilib.
Bölmənin digər xəbərləri
