Xocalı soyqırımının canlı şahidləri erməni daşnaklarının insanlığa sığmayan vəhşiliklərdən danışmışlar
Tərtər, 26 fevral (AZƏRTAC, Tahir Ağaməmmədov). Xocalı faciəsi qurbanlarının xatirəsi respublikamızın hər yerində olduğu kimi, Tərtər rayonunda da dərin hüznlə anılmışdır.
AZƏRTAC xəbər verir ki, rayon rəhbərliyi, ağsaqqallar, gənclər, ziyalılar, müharibə veteranları, əmək kollektivlərinin nümayəndələri və Xocalıdan olan məcburi köçkünlər “Şəhidlər” abidəsi önünə gül dəstələri düzərək faciə qurbanlarının xatirəsini ehtiramla yad etmiş, şəhidlərin ruhuna dualar oxunmuşdur.
Heydər Əliyev mərkəzində davam edən tədbirdə Xocalı soyqırımından bəhs edən film göstərilmişdir. Tədbirdə çıxış edənlər erməni millətçilərinin keçmiş SSRİ-nin 366-cı motoatıcı alayının köməyi ilə 1992-ci il fevralın 25-dən 26-na keçən gecə Xocalı şəhərində törətdikləri qırğının acı nəticələrindən, dinc əhaliyə amansız divan tutulmasından söhbət açmışlar.
Xocalıdan olan məcburi köçkünlər o dəhşətli günlərdə yaşananları bir daha xatırlayaraq, erməni daşnaklarının insanlığa sığmayan, qocaya, uşağa, qadına məhəl qoymadan törətdikləri vəhşiliklərdən danışmışlar. Xocalı sakinləri hərtərəfli qayğı ilə əhatə olunduqlarını vurğulayaraq, bu diqqətə görə dövlətimizin başçısına minnətdarlıqlarını ifadə etmişlər.
Rayon icra hakimiyyəti tərəfindən Xocalıdan olan ailələrə maddi yardım göstərilmişdir.
Bölmənin digər xəbərləri
