XOCALILILAR FERMERLƏRƏ ƏLAVƏ DÖVLƏT DƏSTƏYİNİ RAZILIQLA QARŞILAMIŞLAR
AZƏRTAC-ın müxbiri xəbər verir ki, Goranboy rayonunun Aşağı Ağcakənd qəsəbəsində yerləşən Xocalı Rayon İcra Hakimiyyətində Azərbaycan Prezidenti İlham Əliyevin “Kənd təsərrüfatı məhsulları istehsalçılarının toxum, gübrə və damazlıq heyvanları ilə təmin edilməsinə əlavə dəstək verilməsi barədə” 2008-ci il 21 avqust tarixli Sərəncamından irəli gələn vəzifələrlə bağlı yığıncaq keçirilmişdir.
Yığıncaqda bildirilmişdir ki, xocalılılar məcburi köçkünlük həyatı yaşasalar da, hər il kənd təsərrüfatı məhsulları istehsalında uğurlar qazanırlar. Təkcə bu il 869 hektar sahədən 27769 sentner taxıl yığılmışdır. Hər hektardan 19 sentner məhsul əldə olunmuşdur ki, bu da keçən ildəkindən 5 sentner çoxdur. 22,1 hektar sahənin otu biçilmiş, 209,5 hektar sahədə şum aparılmışdır.
Aqrar sahədə fəaliyyət göstərən iş adamları yığıncaqda çıxış edərək, fermerlərə göstərilən dövlət dəstəyini yüksək qiymətləndirmişlər. Onlar bu qayğıya cavab olaraq daha həvəslə işləyəcəklərini, ölkədə ərzaq bolluğunun yaradılması üçün var qüvvələrini əsirgəməyəcəklərini bildirmişlər.
Bölmənin digər xəbərləri
