Xocalının dinc sakinləri məhz azərbaycanlı olduqlarına görə soyqırımına məruz qalıblar
Bakı, 24 fevral, AZƏRTAC
Dövlət Miqrasiya Xidmətində (DMX) Xocalı soyqırımının 25-ci ildönümü ilə əlaqədar anım tədbiri keçirilib.
DMX-nin mətbuat xidmətindən AZƏRTAC-a bildiriblər ki, əvvəlcə soyqırımı qurbanlarının xatirəsi yad olunub.
Xidmət rəisinin birinci müavini Vəli Nağıyev Xocalı soyqırımın başvermə səbəbləri, şəhərin işğalı zamanı ermənilər tərəfindən dinc, günahsız əhaliyə qarşı törədilmiş genişmiqyaslı qanlı hərbi cinayət barədə ətraflı məlumat verib. Bildirib ki, tarixboyu ermənilər xalqımıza qarşı düşmənçilik mövqeyi tutub, müxtəlif dövrlərdə Azərbaycana qarşı beynəlxalq hüquq normalarına zidd müxtəlif təxribat və qırğınlar törədiblər. 1992-ci ilin fevralın 25-dən 26-na keçən gecə Ermənistan silahlı qüvvələri blokada şəraitində olan Xocalıya ağır texnika, tank və iriçaplı silahlarla hücuma keçib. Xocalının dinc sakinləri məhz azərbaycanlı olduqlarına görə qətlə yetiriliblər, misli görünməyən işgəncələrə məruz qalıblar. Xocalı soyqırımı XX əsrin sonuna yalnız Azərbaycan xalqına qarşı deyil, bütün bəşəriyyətə qarşı yönəlmiş ağır cinayət kimi tarixə düşüb.
Diqqətə çatdırılıb ki, ulu öndər Heydər Əliyevin təşəbbüsü ilə Milli Məclis 1994-cü il fevralın 24-də “Xocalı Soyqırımı Günü haqqında” xüsusi qərar qəbul edib. Həmin sənəddə faciənin başvermə səbəbləri təfsilatı ilə açıqlanıb. Eyni zamanda, Xocalı faciəsi ilə bağlı həqiqətlərin dünya ictimaiyyətinə çatdırılması, erməni qəsbkarlarının beynəlxalq müstəvidə ifşası mühüm vəzifə kimi qarşıya qoyulub. 2008-ci ildən başlayaraq, Heydər Əliyev Fondunun vitse-prezidenti Leyla Əliyevanın təşəbbüsü ilə Xocalı soyqırımının dünya ictimaiyyətinin diqqətinə çatdırılması məqsədilə “Xocalıya ədalət!” təbliğat-təşviqat kampaniyası aparılır. Kampaniyanın uğurla həyata keçirilməsi nəticəsində artıq bir sıra dövlətlər Xocalıda törədilən qırğını soyqırımı kimi qəbul edib.
Tədbirdə soyqırımı qurbanlarının xatirəsinin xalqımız və dövlətimiz tərəfindən daim əziz tutulduğu, hər il bu faciə ilə bağlı Azərbaycan ilə yanaşı, dünyanın ayrı-ayrı ölkələrində çoxlu sayda konfrans, sərgi, yürüş və anım tədbirlərinin təşkil edildiyi bildirilib.
Sonda Xocalı faciəsindən bəhs edən sənədli film nümayiş olunub.
Bölmənin digər xəbərləri
