YANĞINDAN EHTİYATLI OLUN
Baş Dövlət Yanğın Təhlükəsizliyi İdarəsindən AZƏRTAC-a bildirmişlər ki, iyulun 22-də paytaxtın Əzizbəyov rayonunda - Binə ticarət mərkəzinə gedən yeni yolda yanğın baş vermişdir. Nəticədə 400 kilovat gücünə malik transformatorun yağı yanmış, metal konstruksiyaları deformasiyaya uğramışdır. Yarım saatdan çox davam edən yanğına transformatorun həddən artıq yüklənməsi səbəb olmuşdur.
X X X
Cəlilabad rayonunun Göytəpə qəsəbəsinin Savalan küçəsində İbrahim Hətəmova məxsus birmərtəbəli evin əşyaları və 72 kvadratmetr sahəsi yanıb külə dönmüşdür. Yanğının elektrik naqillərində baş vermiş qısaqapanmadan törədiyi güman edilir.
