Yaponiyada iki müxalifət partiyası birləşib
Tokio, 8 may, AZƏRTAC
Yaponiyada iki müxalifət partiyası birləşərək Xalqın Demokratik Partiyası adlı yeni siyasi təşkilat yaradıb.
Yeni partiyanın Demokratik və Ümid partiyalarının birləşməsindən yarandığı və hazırda aşağı palatada 39, yuxarı palatada isə 23 yerə malik olduğu bildirilir. Bunun nəticəsində yeni siyasi təşkilat Yaponiyada Konstitusiyalı Demokratik Partiyadan sonra ikinci müxalifət partiyasına çevrilib.
Demokratik Partiyanın sədri Kohey Otsuka və Ümid Partiyasının sədri Yuiçiro Tamaki yeni partiyanın həmsədrləri seçiliblər.
K.Otsuka bildirib ki, yeni partiya demokratiyanın möhkəmlənməsi, həyat şəraitinin yaxşılaşması və iqtisadi inkişaf üçün yeni imkanlar yaradacaq.
Y.Tamaki isə bəyan edib ki, yeni yanaşma nöqtəsi əldə edən partiya başqa partiyalardan fərqli olaraq hökumətə daha kəskin suallar verəcək.
Birləşməyədək bu iki partiyanın parlamentdə 100-dək yeri olsa da, onların 40-dan çoxu yeni partiyaya daxil olmaqdan imtina edib. Belə ki, Demokratik Partiyanı təmsil edən sabiq Baş nazir Yoşihiko Noda və sabiq xarici işlər naziri Katsuya Okada, həmçinin Ümid Partiyasından olan sabiq ətraf mühit naziri Qoşi Hosono yeni partiyaya üzvlükdən imtina ediblər.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
