Yaponiyada respondentlərin əksəriyyəti ölkədə vaksinasiya prosesinin ləng aparıldığını bildirib
Tokio, 11 avqust, AZƏRTAC
Yaponiya əhalisinin 75 faizi ölkədə koronavirus pandemiyasına qarşı vaksinasiya prosesinin ləng aparıldığını bildirib.
AZƏRTAC xəbər verir ki, bu barədə NHK telekanalı tərəfindən aparılan sorğunun avqustun 11-də yayılan nəticələrində bildirilir. Bununla yanaşı, rəyi soruşulanların yalnız 18 faizi vaksinasiyanın vaxtında aparıldığını qeyd edib. Qalan 7 faiz isə sualı cavablandırmaqda çətinlik çəkib.
Avqustun 7-dən 9-dək mobil və stasionar telefonlar vasitəsilə aparılan sorğuda 1214 nəfərin iştirak etdiyi bildirilir.
Xatırladaq ki, Yaponiyada vaksinasiya prosesinə fevralın ortalarında başlanılıb. Təqribən 4,8 milyon səhiyyə işçisinin vaksinasiyası artıq başa çatdırılıb. Aprelin 12-də ölkədə yaşı 65-dən yuxarı 36 milyon nəfərin, ötən aydan isə bütün yaş qrupundan olan sakinlərinin vaksinasiyasına başlanılıb. Bu günə olan son məlumata görə, əhalinin 46,9 faizi vaksinin bir, 34 faizi isə hər iki dozasını alıb.
Qeyd edək ki, Yaponiyada Britaniya-İsveç “AstraZeneca” birgə şirkətinin, ABŞ-ın “Moderna” və ABŞ-Almaniya “Pfizer-BioNTech” konsorsiumunun vaksinlərindən istifadə olunur.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
