AZƏRTAC-ın xüsusi müxbiri Ankaradan xəbər verir ki, noyabrın 29-dan 30-na keçən gecə, İraqın Tiqrit şəhəri yaxınlığında iki yapon diplomatının olduğu avtomobilə naməlum şəxslər tərəfindən atəş açılmışdır.

Yaponiyanın İngiltərədəki səfirliyinin mədəniyyət attaşesi 45 yaşlı Katsuşiko Oku və bu ölkənin İraqdakı səfirliyinin ikinci katibi 30 yaşlı Masamori İnoue həlak olmuşlar. Bu məlumat Yaponiya Xarici İşlər Nazirliyi tərəfindən də təsdiq edilmişdir. Diplomatlar İraqın bərpası üçün keçirilən beynəlxalq iclasda iştirak etmək məqsədi ilə Tiqrit şəhərinə getmişdilər.

Yaponiyanın baş naziri Juniçiro Koizumi ölkəsinin İraqın bərpası üçün yardım göstərmək istədiyini və bu terror hadisəsinə baxmayaraq başqa addım atmayacağını bildirmişdir.