Bakı, 1 oktyabr, AZƏRTAC

Sahibkarlığın İnkişafı Fondu ilə Bərpa Olunan Enerji Mənbələri Dövlət Agentliyi arasında görüş keçirilib.

Fonddan AZƏRTAC-a bildirilib ki, görüşün əsas məqsədi yaşıl enerjinin maliyyələşdirilməsində birgə əməkdaşlıq imkanlarının müzakirəsi olub. Yaşıl enerji sahəsində fəaliyyət göstərən biznes subyektlərinin maliyyə əlçatanlığı ilə bağlı cari vəziyyət və güzəştli kreditlərdən istifadənin bu sektordakı stimullaşdırıcı rolu təhlil edilib. Bildirilib ki, güzəştli kreditlərin verilməsində iqtisadiyyatın sahələri üzrə müəyyən edilmiş prioritet istiqamətlərdən biri də bərpaolunan enerji yönümlü layihələrdir. Görüşün sonunda gələcək əməkdaşlıq imkanları ilə bağlı mexanizm təklifləri dinlənilib.