YENİ DƏRSLİKLƏRİN TƏQDİMATI OLMUŞDUR
Tanınmış alim və pedaqoqların iştirak etdikləri mərasimi təhsil naziri Misir Mərdanov açaraq, bir neçə gün öncə ölkəmizdə şəffaf və demokratik şəraitdə keçən prezident seçkilərində xalqımızın görkəmli dövlət xadimi Heydər Əliyevin siyasi xəttinin layiqli davamçısı, Baş nazir İlham Əliyevə səs verdiyini vurğulamış və mərasimə toplaşanları bu münasibətlə təbrik etmişdir.
Respublikamızın təhsil sistemində qazanılmış uğurlardan danışan nazir orta ümumtəhsil məktəbləri üçün bütün yeni dərslik və dərs vəsaitlərinin, o cümlədən “Çaşıoğlu” Elm-İstehsalat Firmasında nəfis şəkildə yenicə çap edilmiş “Cəbr” və “Həndəsə” dərsliklərinin azərbaycanlı müəlliflər tərəfindən və ana dilimizdə hazırlandığını diqqətə çatdırmış və bu işdə əməyi olan alim və mütəxəssislərə təşəkkürünü bildirmişdir. O, gələcəkdə dərsliklərin daha da təkmilləşdiriləcəyinə əminliyini söyləmişdir.
“Çaşıoğlu” Elm-İstehsalat Firmasının prezidenti Hikmət Hüseynov çıxış edərək bu müəssisənin son 9 ildə ali və orta ümumtəhsil məktəbləri üçün 500 adda dərslik və dərs vəsaiti, o cümlədən cari ildə orta məktəblər üçün 39 adda 1,5 milyon nüsxədən çox dərslik çap etdiyini bildirmişdir.
Milli Məclisin elm və təhsil məsələləri daimi komissiyasının sədri Şahlar Əsgərov, Bakı Dövlət Universitetinin kafedra müdiri Məmməd Yaqubov, Saatlı rayonundakı 1 nömrəli orta məktəbin riyaziyyat müəllimi, pedaqoji elmləri namizədi Oqtay Məmmədov və başqaları Azərbaycan dilində hazırlanan yeni dərslik və dərs vəsaitlərinin əhəmiyyətini vurğulamışlar.
Bölmənin digər xəbərləri
