AZƏRTAC-ın müxbirinin Tbilisidən verdiyi xəbərə görə, Gürcüstan Mərkəzi Seçki Komissiyası bildirmişdir ki, noyabrın 2-dəki parlament seçkiləri ilə əlaqədar seçki məntəqələrinin 70 faizində səslərin ilkin hesablanması başa çatmışdır.

İqtidaryönlü “Yeni Gürcüstan uğrunda” bloku əvvəlkitək liderdir. O, səslərin 26 faizini toplamışdır. Sonrakı iki yerlərdə “Milli hərəkat” bloku (23,3 faiz) və Leyborist Partiyası (14,3 faiz) gedirlər.

2870 seçki məntəqəsindən 25-də seçkilər baş tutmamış hesab edilmişdir. Onlarda təkrar səsvermə noyabrın 16-na təyin olunmuşdur.

Üç müxalifət partiyasının noyabrın 5-də keçirdiyi mitinqlərdən sonra Tbilisidə sakitlikdir. Şəhər adi ahəngi ilə yaşayır, küçələrdə DİN-in daxili qoşunlarının əsgərləri və xüsusi təyinatlı qüvvələr gözə dəymir.