YENİ MƏKTƏB BİNASI TİKİLİR

15.11.2003 [14:56]
Çap et
A⁺ A^-

Respublikamızın cənub bölgəsində aramsız yağan yağışlar kənd adamlarını sınağa çəkərək, onları bir sıra problemlərlə üzləşdirmişdir. Güclü yağışlar nəticəsində Astara rayonunun Koraba və Miki kəndlərindəki məktəblərə ciddi ziyan dəymiş, hər iki təhsil ocağının binası yararsız hala düşmüşdür. Yaranmış vəziyyətlə əlaqədar təxirəsalınmaz tədbirlər həyata keçirilmişdir. Respublika Sərhəd Qoşunları Xidməti tədrisi davam etdirmək məqsədi ilə Koraba kənd orta məktəbinə 4 böyük çadır vermişdir. Hazırda şagirdlər həmin çadırlarda təhsillərini davam etdirirlər.

Rayon təhsil şöbəsindən AZƏRTAC-ın müxbirinə bildirmişlər ki, sentyabr ayının əvvəllərində Koraba kəndində yeni məktəb binasının tikintisinə başlanmışdır. Tikintidə özül işləri artıq başa çatmışdır. Daxili imkanlar hesabına inşa edilən məktəb binasının bu ilin sonunadək istifadəyə verilməsi nəzərdə tutulmuşdur.

Miki kəndində də məktəb binasının tikintisi ilə əlaqədar layihə-smeta sənədləri hazırlanır.

Hələlik isə, kənddə tədris növbəlilik əsasında yardımçı binalarda davam etdirilir.