ELM VƏ TƏHSİL
Yerdəyişmə müsabiqəsində 3 il müddətsiz müqavilə ilə çalışmasını tamamlayan müəllimlər iştirak edə bilərlər
Bakı, 24 noyabr, AZƏRTAC
İstər yerdəyişmə, istərsə də qarşılıqlı yerdəyişmə proqramında müəllimlər işə qəbul imtahanında (MİQ) topladıqları balla iştirak edirlər. Həmçinin müəllimlər müsabiqəyə sertifikatlaşdırma imtahanının nəticəsi ilə də qoşula bilərlər.
AZƏRTAC xəbər verir ki, bunu İnsan resursları mərkəzinin direktoru Nurlan İsmayılbəyli Təhsil TV-də yayımlanan "Təhsil masası"nda deyib.
Onun sözlərinə görə, yerdəyişmə ilə bağlı adətən Bakı-Sumqayıt, yaxud da Bakıətrafı qəsəbələrdə çalışan müəllimlər müraciət edirlər: "Ötən tədris ilində yerdəyişmədən yararlanan müəllimlər bu il qarşılıqlı yerdəyişmə platformasından istifadə edə bilmirlər. Çünki onlar iş yerlərini yeni dəyişiblər və öz istəkləri ilə bu müəssisələrə işə qəbul olublar. Qarşılıqlı yerdəyişmə zamanı bəzən müəllimlər dərs saatlarını yüksək göstərməyə çalışırlar. Sənədlərdə tərsmütənasiblik olduğu təqdirdə şəxsin cari tədris ilində platformada istifadəsi məhdudlaşdırılacaq. Çalışacağıq ki, platformaya müraciət edən müəllimlər növbəti yarımildən yeni iş yerlərində fəaliyyətlərini davam etdirə bilsinlər".
Nurlan İsmayılbəyli qeyd edib ki, yerdəyişmə müsabiqəsində iştirak etmək üçün bir müəllim 3 il müddətsiz müqavilə ilə çalışmasını tamamlamalıdır, yalnız bu halda platformaya müraciət edə bilər.