Yokohama yaxınlığındakı kruiz laynerində koronavirusa yoluxan 10 nəfər aşkarlanıb
Tokio, 5 fevral, AZƏRTAC
Yokohama yaxınlığında səfərdə olan “Diamond Princess” kruiz laynerində koronavirusun yeni tipinə yoluxmuş 10 nəfər aşkar edilib.
AZƏRTAC Yaponiya Səhiyyə Nazirliyinə istinadla xəbər verir ki, həkimlər artıq həmin gəmidəki bütün sərnişinlərin müayinəsinə başlayıblar.
Nazirlikdən bildirilib ki, bu barədə Honkonqdan olan sərnişin öz doğma şəhərində gəmini tərk etdikdən sonra məlum olub. Gəmidə yüksək temperaturu olan bütün sərnişinlər, heyət üzvləri və xəstəliyə yoluxmuş həmin şəxslə birbaşa ünsiyyətdə olanların hamısı müvafiq müayinədən keçirilir. Əlavə olaraq bildirilir ki, gəminin göyərtəsində 3700 nəfər sərnişin və heyət üzvü var.
Fevralın 5-də parlamentin aşağı komitəsində büdcə komissiyasının iclasında çıxış edən Baş Nazir Şinzo Abe deyib ki, gəmidə olanlar lazım olan müddətdə onu tərk etməyəcəklər.
Həmçinin qeyd edilir ki, virusa yoluxmuş şəxslərin artıq xəstəxanalara yerləşdirilməsinə başlanılıb.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
