YOL-NƏQLİYYAT HADİSƏLƏRİ ÖLÜMLƏ NƏTİCƏLƏNMİŞDİR
Daxili İşlər Nazirliyinin mətbuat xidmətindən AZƏRTAC-a bildirmişlər ki, mayın 23-də Füzuli rayonunun Şükürbəyli kəndi ərazisində, Kərimbəyli kənd sakini Məmmədqulu Bədəlov idarə etdiyi “MTZ-80” markalı traktoru aşıraraq hadisə yerində ölmüşdür.
Mayın 24-nə keçən gecə Biləsuvar rayonu ərazisində rayon sakini Rəşad Zülfüqarov sürdüyü “VAZ-21011” markalı avtomaşını yolun kənarında dayanmış kənd sakini Şirinəli Məmmədova məxsus “MTZ-80” markalı traktora vurmuşdur. Hadisə nəticəsində “Jiquli”nin sürücüsü R.Zülfüqarov hadisə yerində ölmüşdür.
Mayın 23-də Tərtər rayonu ərazisində, Ağdam rayon sakini Bəxtiyar Abdullayev “VAZ-2106” markalı avtomaşınla həmyerlisi Validə Baxşəliyevanı vurmuşdur. Xəsarətlə xəstəxanaya yerləşdirilmiş V.Baxşəliyeva ölmüşdür.
Mayın 24-də Xızı rayonu ərazisində, Sabirabad rayon sakini Mikayıl Abbasov idarə etdiyi “VAZ-2107” markalı avtomaşını elektrik dirəyinə vurmuş, nəticədə M.Abbasov hadisə yerində ölmüşdür.
Faktlarla bağlı araşdırmalar aparılır.
Bölmənin digər xəbərləri
