MƏDƏNİYYƏT
YUNESKO-DA AZƏRBAYCAN XALQ ÇALĞI ALƏTLƏRİ ANSAMBLININ KONSERTİ
YUNESKO-nun əsas binasında Azərbaycanın xalq çalğı alətləri ansamblının geniş proqramda konserti olmuşdur. Ölkəmizin musiqisinə və qədim xalq çalğı alətlərinə böyük maraq və həvəs göstərən fransız musiqisevərləri müğənnilərdən Teyyub Aslanov və Nuriyyə Hüseynovanın ifasında səslənmiş “Dəli ceyran”, “Sevirəm səni”, “Nazlana-nazlana”, “Gülə-gülə”, “Azərbaycan maralı”, “Sarı gəlin” xalq mahnılarını, “Bayatı şiraz” və “Şur” muğamlarını hərarətlə qarşılamışlar.
Fransız tamaşaçıları tar, saz, dəf, ney, qoşa nağara, ud və digər musiqi alətləri ilə yaxından tanış olmuş, musiqiçilərimizin bu alətlərdəki ifaçılıq tərzini sürəkli alqışlarla qarşılamışlar.
YUNESKO-nun bu konsertlə bağlı yaydığı məlumatda Azərbaycan musiqisinin bir çox Avropa ölkələrində, xüsusilə Fransada tez-tez səsləndiyi, özünə hədsiz pərəstişkarlar tapdığı qeyd edilmiş, mahnılarımızın daha qədimliyinə işarə edilərək onların xalqımızın adət-ənənələrindən yarandığı xüsusi vurğulanmışdır.
Əsgər Əliyev
AZƏRTAC-ın xüsusi müxbiri
Paris