YÜNGÜL ATLETİKA ÜZRƏ MƏŞQÇİ SERGEY TƏHMƏZOVUN ÇIXIŞI
Hörmətli xanımlar və cənablar!
Bugünkü tədbirdə çoxlu yaxşı söz deyildi. Lakin mən, sadəcə olaraq, bizim Paralimpiya kəndində baş vermiş iki hadisəni xatırlamaq istərdim.
Birinci hadisə biz kiçik, amma çox beynəlmiləl komandamızla oraya gəldikdə baş verdi. Hamı sual verir, deyirdi: “Biz sizə baxırıq, görürük ki, komandanız müxtəlif millətlərdən olan adamlardan ibarətdir”. Doğrudan da, komandada azərbaycanlılar, ruslar, ləzgi, ukraynalı, belarus vardı. Çox mehriban beynəlmiləl komandadır. Biz bu suala belə cavab verdik: “Bu, XX əsrin axırlarının dahi siyasi xadimi Heydər Əliyevin beynəlmiləlçilik siyasətinin nəticəsidir. Bu siyasət uzun müddət ərzində həyatımızda öz yerini tutur və onu dahi Heydər Əliyevin oğlu, Prezidentimiz İlham Əliyev davam etdirir”. Mənə daha bir sual verdilər, bu mükafat fondu barədə idi. Biz Prezidentimizin bizim üçün gördüyü işlərdən danışdıq. Hamı məəttəl qaldı. Sözün düzü, mən onların gözlərində heyranlıq, sevinc və hətta həsəd hissləri gördüm. Biz cavab verdik ki, Prezidentimiz yeni zəmanənin novatorudur, üçüncü minilliyin Prezidentidir, yaradıcı Prezidentdir. O, demokratiyanın ali prinsipini – sosial bərabərlik prinsipini bərqərar etmişdir.
Cənab Prezident, bu prinsipi bərqərar etdiyinizə və həyata keçirdiyinizə görə bütün paralimpiya komandamız Sizə dərin, səmimi fərəh hissi ilə və böyük minnətdarlıqla təşəkkür edir. Dahi Heydər Əliyevin layiqli oğlu kimi Siz həmişə müdrik və düzgün qərarlar qəbul edirsiniz. Mən bunları demək istəyirdim.
Sizə bir daha çox sağ olun deyirik. İcazə versəydiniz, kiçik bir arzumu bildirərdim. Paralimpiya hərəkatımızı inkişaf etdirən insanlar 12 ildir bizimlə əl-ələ, çiyin-çiyinə işləyirlər. Onlar bizim Paralimpiya Komitəsinin hörmətli prezidenti İlqar müəllimdir, komitənin baş katibi Afiq müəllimdir, komitənin vitse-prezidenti Ziyadxan müəllimdir. Onlar çox böyük və çətin bir iş görürlər. İstərdim ki, onların əməyi qiymətləndirilsin. Çox sağ olun.
X X X
“Yunanıstanın Afina şəhərində keçirilən XII Yay Paralimpiya Oyunlarında əldə edilmiş nəticələrə görə mükafatların müəyyən edilməsi haqqında” Azərbaycan Respublikası Prezidentinin Sərəncamı oxundu.
(Sərəncamın mətni qəzetin birinci səhifəsində dərc olunur).
X X X
İLHAM ƏLİYEV: Mən onu da qeyd etmək istəyirəm ki, eyni zamanda Milli Olimpiya Komitəsi də yüksək nəticə göstərmiş idmançılara öz mükafatlarını təsis edibdir. Təbii ki, burada da məsələyə sosial ədalət prinsipi əsasında baxılıbdır və beləliklə, dövlət tərəfindən ayrılmış mükafatla yanaşı, Milli Olimpiya Komitəsi də birinci yeri tutan idmançıya 125 milyon manat mükafat ayırıbdır. İkinci yeri tutan idmançı 75 milyon manat alacaqdır. Üçüncü yeri tutan idmançı isə 50 milyon manat alacaqdır. Məşqçilər - birinci yeri tutan idmançının məşqçisi 62,5 milyon manat, ikinci və üçüncü yeri tutan idmançıların məşqçiləri də buna müvafiq qaydada mükafatlar alacaqlar.
Belə olan halda ümumiyyətlə, Zəkiyev İlham 375 milyon manat, Panyutin Oleq 375 milyon manat, Bilalov Zeynəddin 200 milyon manat, Yelena Taranova 110 milyon manat alacaqlar. Məşqçilər - Əhməddin Rəcəbli 187,5 milyon manat, Sergey Təhməzov 187,5 milyon manat və Vitali Sotnikov 55 milyon manat alacaqlar.
X X X
Azərbaycan Prezidenti İlham Əliyev XII Yay Paralimpiya Oyunlarında medal qazanmış idmançılara və onların məşqçilərinin hər birinə mükafatlar və gül dəstəsi təqdim etdı və dedi:
- Əziz dostlar, Sizi bu qələbə münasibətilə, yüksək nəticələr münasibətilə bir daha ürəkdən təbrik edirəm. Əminəm ki, bundan sonra da siz doğma Vətənimizin idman şərəfini ləyaqətlə qoruyacaq və Azərbaycana yeni qələbələr, yeni uğurlar gətirəcəksiniz.
Sizi bir daha təbrik edirəm, cansağlığı, uğurlar arzulayıram. Sağ olun!
X X X
Prezident İlham Əliyev paralimpiyaçılarla xatirə şəkli çəkdirdi.
Qəbulda gənclər, idman və turizm naziri Əbülfəz Qarayev və digər rəsmi şəxslər iştirak edirdilər.
Bölmənin digər xəbərləri
