Zaqatalada kənd təsərrüfatının inkişafına yeni layihələrlə töhfə verilir
Zaqatala, 14 sentyabr, AZƏRTAC
Zaqatala rayonunda kənd təsərrüfatının müxtəlif istiqamətləri üzrə istehsalın artırılması, müasir texnologiyaların tətbiqi və emal imkanlarının genişləndirilməsi istiqamətində bir sıra yeni layihələr həyata keçirilir.
AZƏRTAC-ın bölgə müxbiri xəbər verir ki, Prezident Administrasiyasının məsul əməkdaşı və rayon rəhbərliyinin iştirakı ilə “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”ndan irəli gələn vəzifələrin icrası məqsədilə rayonda həyata keçirilən layihələrlə yerində tanışlıq olub.
Əvvəlcə Dövlət Proqramı çərçivəsində rayonda sahibkarların təşəbbüsləri, görülən işlər və gələcək planları barədə məlumat verilib.
Fındıqçılıq və meyvəçilik sahəsində “Agrarco” MMC intensiv fındıq bağlarının sahəsini əlavə 230 hektar artıraraq 600 hektara çatdırmağı, yeraltı damlama suvarma sistemi hesabına məhsuldarlığı hektardan 21 sentnerə yüksəltməyi və istehsalı 513 tondan 1001 tona çatdırmağı planlaşdırır. Layihə çərçivəsində İsraildən suvarma avadanlıqları, İtaliyadan isə 5 ədəd dərman və herbisid çiləyicisi alınıb. Tinglərin əkilməsinə və avadanlıqların quraşdırılmasına noyabr ayında başlanacaq.
“AzerNuts” MMC tərəfindən 30 hektar sahədə intensiv xurma bağlarının salınması nəzərdə tutulur. Hektardan 300 sentner məhsuldarlıqla 900 ton məhsul istehsalı gözlənilir. Təsərrüfatda artezian quyusu qazılıb və suvarma gölü yaradılıb. Tinglərin əkilməsinə noyabr ayında başlanacaq.
Sahibkar Kamran İsayev isə əlavə 20 hektar xurma bağı salaraq mövcud bağların sahəsini 30 hektara çatdırmağı, məhsul istehsalını 25 tondan 75 tona yüksəltməyi hədəfləyir. İşlərin 2027-ci ilin oktyabrından 2029-cu ilin dekabrınadək aparılması nəzərdə tutulur.
Tütünçülük sahəsində “Tabaterra Leaf” MMC tərəfindən 250 hektar tütün sahəsində 14 ədəd “Tambur” yağışyağdırma sistemi quraşdırılıb.
Üzümçülük sahəsində sahibkar İsmayıl Orucov tərəfindən 3 hektar sahədə “Avatar” sortundan olan yeni üzüm bağının salınması üzrə işlər aparılır. Hektardan 250 sentner məhsuldarlıqla 75 ton məhsul istehsalı nəzərdə tutulur. Hazırda ərazidə təmizləmə, planlaşdırma və hazırlıq işləri görülür. Layihənin 2026-cı ilin noyabrında başa çatdırılması gözlənilir.
Arıçılıq və heyvandarlıq sahəsində Mövlüddin Qurbanəliyev məhsuldar ana arıların seleksiyası və yetişdirilməsi hesabına arı ailələrinin sayını 600-dən 1200-ə, bal istehsalını isə 11 tondan 25 tona çatdırmağı planlaşdırır. Təsərrüfat üçün süni mayalanma avadanlıqları alınıb və pətəklər üçün çərçivələrin hazırlanması aparılır.
Sahibkar Süleyman Süleymanov tərəfindən isə 325 kvadratmetr sahədə müasir tipli mini-fermanın yaradılması, heyvanların sayının 15 başa çatdırılması və süd istehsalının 20 tondan 100 tona yüksəldilməsi nəzərdə tutulur. Hazırda köhnə mal damının sökülməsinə başlanılıb.
Emal sahəsində sahibkar Ayaz Allahverdiyev tərəfindən yerli xammala əsaslanan konserv məhsullarının istehsalı müəssisəsi yaradılır. 240 kvadratmetr sahəsi olan istehsal binasının tikintisi başa çatdırılıb, qaz və su xətləri çəkilib, 25 ton tutumlu ehtiyat su çəni və 20 ton tutumlu soyuducu quraşdırılıb. Layihənin 2026-cı ilin noyabrında başa çatdırılması planlaşdırılır.
Sahibkar Abdurəhman Soltanov tərəfindən isə yun emalı müəssisəsinin yaradılması istiqamətində iş aparılır. Hazırda yapıncı istehsalı üçün avadanlıqların alınması məqsədilə Türkiyənin müvafiq şirkətləri ilə danışıqlar davam etdirilir.
Baxış zamanı sahibkarlarla görüşlər keçirilib, onların fəaliyyəti, gələcək planları və qarşılaşdıqları məsələlər dinlənilib. Dövlət tərəfindən yaradılan subsidiya, güzəştli maliyyələşmə və digər dəstək mexanizmlərindən səmərəli istifadənin vacibliyi vurğulanıb.
Səfərin davamı olaraq rayon icra hakimiyyətində kənd təsərrüfatı məhsullarının istehsalı və emalı ilə məşğul olan təsərrüfatların və emal müəssisələrinin rəhbərləri, aidiyyəti dövlət qurumlarının yerli nümayəndələri və “Əlaqələndirmə Qərargahı”nın üzvləri ilə görüş keçirilib. Görüşdə zona müşavirəsində irəli sürülmüş təşəbbüslərin icra vəziyyəti, Dövlət Proqramı çərçivəsində görülən işlər və qarşıda duran vəzifələr müzakirə olunub.
Qeyd edilib ki, müasir texnologiyaların tətbiqi, intensiv bağların genişləndirilməsi, məhsuldarlığın artırılması, yerli xammal əsasında emal müəssisələrinin yaradılması və sahibkarlıq təşəbbüslərinin dəstəklənməsi rayonda aqrar sektorun inkişafının əsas istiqamətlərindəndir.
Müxbir - Rasim İslamoğlu
Bölmənin digər xəbərləri
