Zəfər zirvəsinə yüksələn qəhrəmanlar
Məktəblilər arasında bu mövzuda keçirilən inşa yazı müsabiqəsi və şahmat turnirinin qalibləri mükafatlandırılıb
Bakı, 6 noyabr, AZƏRTAC
Noyabrın 6-da Xətai Rayon İcra Hakimiyyətinin, YAP Xətai rayon təşkilatının və “Təhsil” Respublika İdman Mərkəzi 3 nömrəli Respublika ixtisaslaşdırılmış olimpiya ehtiyatları uşaq-gənclər idman-şahmat məktəbinin birgə təşkilatçılığı ilə 8 Noyabr - Zəfər Günü münasibətilə rayon məktəbliləri arasında “Zəfər zirvəsinə yüksələn qəhrəmanlar” mövzusunda təşkil olunan inşa yazı müsabiqəsinin və şahmat turnirinin qaliblərinin mükafatlandırılması mərasimi keçirilib.
Əvvəlcə müasir müstəqil Azərbaycan dövlətinin qurucusu, Ümummilli Lider Heydər Əliyevin və şəhidlərin xatirəsi bir dəqiqəlik sükutla yad edilib.
AZƏRTAC xəbər verir ki, tədbirdə çıxış edən YAP Xətai rayon təşkilatının sədri Vüqar Rəhimzadə Zəfər Günü münasibətilə paytaxt və bölgələrdə keçirilən silsilə tədbirlərdən söz açıb. O qeyd edib ki, Yeni Azərbaycan Partiyası Xətai rayon təşkilatının da tədbirlər planına uyğun olaraq Zəfər Günü ilə bağlı tədbirlər keçirilir. İnşa yazı müsabiqəsi və şahmat turniri də bu qəbildəndir.
“Vətən müharibəsində qəhrəmancasına döyüşərək ölkəmizin ərazi bütövlüyü uğrunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq onların ruhu qarşısında baş əyir, Allahdan rəhmət diləyirik. Zəfər zirvəsinə yüksələn qəhrəmanlar hər zaman xalqımızın qəlbində yaşayacaq”, - deyə YAP Xətai rayon təşkilatının sədri vurğulayıb.
Xətai Rayon İcra Hakimiyyəti başçısının müavini Rafiq İsayev qeyd edib ki, tarixi Zəfərimiz qürurumuzdur: “Azərbaycan xalqının əzmi və iradəsi, iqtisadi gücü, müasir ordu quruculuğu və xalq-iqtidar birliyi ölkəmizin qələbəsini təmin edən mühüm amillər oldu. Ulu əcdadlarımızın zəngin dövlətçilik və hərb tarixindən ilhamlanan Azərbaycan xalqı daha bir şanlı qəhrəmanlıq salnaməsi yazaraq, özünün qalib xalq olduğunu bütün dünyaya sübut etdi və düşmən üzərində tarixi Zəfər qazandı. Xalqımızın qüdrətinin və milli qürurumuzun təntənəsinə çevrilən, dövlətimizin nüfuzu və gələcək inkişafı baxımından müstəsna əhəmiyyət kəsb edən bu misilsiz Qələbənin əbədiləşdirilməsi məqsədilə 8 noyabr tarixinin Zəfər Günü kimi təsis edilməsi hər birimizi qürurlandırır. Dastana çevrilən Şuşa əməliyyatının fonunda işğal altındakı bütün torpaqlımızın azad edilməsi üçün canlarını fəda edən Vətən övladlarının həyat yolunun vərəqlənməsində əhəmiyyətli rol oynayır”.
“Təhsil” Respublika İdman Mərkəzi 3 nömrəli Respublika ixtisaslaşdırılmış olimpiya ehtiyatları uşaq-gənclər idman-şahmat məktəbinin direktoru Cəmil Fətullayev ölkəmizdə idmanın hər bir növünün inkişafı üçün geniş imkanlar yaradıldığını qeyd edib. O bildirib ki, belə tədbirlər gələcəyimiz olan gənclərin vətənpərvərlik ruhunda tərbiyə olunmasında böyük əhəmiyyətə malikdir.
Sonda qaliblər diplom və hədiyyələrlə mükafatlandırılıb.
Bölmənin digər xəbərləri
