ZƏLZƏLƏDƏN ZƏRƏRÇƏKƏNLƏRƏ PUL TOPLAMAQ ÜÇÜN BRÜS LİNİN EVİNİ SATACAQLAR
AZƏRTAC xəbər verir ki, Çinin Sıçuan əyalətində zəlzələdən zərərçəkənlərə vəsait toplamaq məqsədilə tamaşaçıların pərəstiş etdiyi kinoaktyor və kun-fu ustası Brüs Linin Honkonqdakı ikimərtəbəli evi satılacaqdır.
Belə bir qərara gəldiyini evin indiki sahibi - 86 yaşlı sahibkar Yuy Panlin elan etmişdir. O, elə bu məqsədlə Koulun yarımadasındakı daha 4 evini satışa çıxarmışdır.
Brüs Linin təşvişə düşmüş pərəstişkarları filantropu onların sevimlisinin evini satmamağa, əksinə, onu qoruyub saxlamağa və muzeyə çevirməyə çağırmışlar. Aktyorun fan-klubunun sədri Vonq Yu demişdir: “Bu, Brüs Linin sonuncu iqamətgahı idi, bu bina böyük tarixi dəyərə malikdir”.
Fan-klubun sədri yaxın günlərdə biznesmenlə şəxsən görüşmək, onu orada turistlər üçün muzey yaratması, giriş biletləri müqabilində əldə ediləcək bütün pulları isə zəlzələdən zərərçəkənlərə yardım fonduna yönəltməsi üçün dilə tutmağa cəhd göstərmək istəyir.
Bölmənin digər xəbərləri
