“Zirə” inamla irəliləyir, “Qarabağ” iddiasını ortaya qoyur - ŞƏRH
Bakı, 26 sentyabr, AZƏRTAC
Ötən gün Azərbaycan Premyer Liqasında VII tura yekun vurulub.
AZƏRTAC xəbər verir ki, heç-heçələrlə bol olan turda sensasiya da qeydə alınıb.
Açılış matçında “Sumqayıt” doğma meydanda “Turan Tovuz”la qolsuz sülhə razılaşıb. Ardıcıl dörd turdur qələbə qazana bilməyən “gənclik şəhəri” təmsilçisi bölgə klubu ilə qarşılaşmada da sindromu qıra bilməyib. Ehtiyatda bir oyunu olan sumqayıtlılar orta sıralarda qərarlaşıblar. Tovuzlular isə məğlubiyyətsiz oyunlar seriyasını üçə çatdırıblar. Son üç turda bir qalibiyyət və iki heç-heçə əldə edən Ayxan Abbasovun komandası yuxarı pillələr uğrunda mübarizəni davam etdirir.
Turun heç-heçə ilə başa çatan digər matçı Zirədə eyniadlı komanda ilə “Neftçi” arasında baş tutub. İki qolun vurulduğu görüşdə tərəflər hərəyə bir xalla kifayətləniblər. Mövsümün əvvəlində baş məşqçi dəyişikliyinə gedən “ağ-qaralar” hələ də öz oyununu tapmaqda və sabit çıxış etməkdə çətinlik çəkir. Görünür, komandanı tam formalaşdırmaq üçün Adrian Mutuya ən azı qış fasiləsinədək zaman lazım olacaq. “Zirə” isə yoluna əmin addımlarla davam edir. Çempionatın vahid lideri xüsusilə iddialı komandalarla oyunlarda qazandığı nəticələrlə diqqət çəkir. Bunadək “Qarabağ” və “Sabah”a qalib gələn “qartallar” “Neftçi” səddini də məğlubiyyətsiz adlaya bilib.
VII turun ən bol qollu matçı paytaxtda gerçəkləşib. Avrokuboklarda mübarizəni dayandırdıqdan sonra bir qədər inamsız təsir bağışlayan “Sabah” aşağı pillələrdə qərarlaşan “Kəpəz”i məğlub edə bilməyib - 2:2. Aleksey Kaşuk və Coy Lens Mikelsin gedişindən sonra oyun planında geriləyən bakılılar “qara zolaq”dan çıxmağa çalışsalar da, cəhdlər hələlik nəticə vermir. Yeni transferlərin komandaya tam uyğunlaşmaması da nəticələrə təsir göstərir. Bu mövsüm iddialı komandalar üçün əsl baş ağrısına çevrilən “Kəpəz” isə səfərdə “Sabah”dan xal almaqla turun sensasiyasına imza atıb. Gəncə təmsilçisi daha əvvəl “Neftçi”ni məğlub edib, “Qarabağ”dan xal alsa da, ortabab komandalarla oyunlarda xallar itirib. Bunun məntiqi nəticəsi olaraq, “sarı-göylər” hazırda turnir cədvəlində yalnız autsayder “Qəbələ”ni qabaqlayır.
Ötən turu qələbə ilə başa vuran iki komandadan biri “Səbail” olub. Doğma meydanda “Araz-Naxçıvan”ı bir cavabsız qolla üstələyən “dənizçilər” ikinci pilləyə yüksəliblər. Əslində ilk turlardakı nəticələrdən sonra çoxları Bakı klubundan bu cür sıçrayış gözləmirdi. Lakin “Səbail” Şahin Diniyevin rəhbərliyi altında hər kəsi təəccübləndirməyə davam edir. “Araz-Naxçıvan” oyun baxımından pis təsir bağışlamasa da, nəticələri qeyri-sabitdir. Komandada baş məşqçi Azər Bağırovun işi aşkar nəzərə çarpır. Qısa müddətə yığılan kollektiv baxımlı oyunu ilə diqqət çəkir. Bu cür davam etsələr, mövsümün sonunda elitada qalacaqları şübhə doğurmur.
Turun digər qalibi isə səfərdə “Qəbələ”ni məğlub edən “Qarabağ” olub. Mövsümə elə də yaxşı başlaya bilməyən ağdamlılar yavaş-yavaş iddiasını ortaya qoyur. 13 xalla üçüncü pillədə qərarlaşan “köhlən atlar”ı lider “Zirə”dən cəmi 3 xal ayırır. Son çempion həm oyun, həm də fiziki baxımdan ideal səviyyəyə yaxınlaşır. Tam formaya düşdükdən sonra, çox güman ki, çempionluğa əsas namizəd olacaqlar. “Qəbələ” isə hələlik özünə gələ bilmir. Ötən mövsümün sonunda aparıcı futbolçuları ilə vidalaşan bölgə təmsilçisi geridə qalan yeddi turda cəmi bir qələbə və eyni sayda heç-heçə əldə edib. Hazırda dörd xalla sonuncu sırada yer alan “qırmızı-qaralar”, görünür, bu mövsüm ən yaxşı halda Premyer Liqadakı yerini qorumaq üçün mübarizə aparacaq.
Bölmənin digər xəbərləri
