“Zirvəyə doğru” azərbaycanlı bəstəkarla iranlı ifaçının birgə yaradıcılıq məhsuludur
Bakı, 23 yanvar, Abdulla Suvar, AZƏRTAC
Bir neçə gündür ki, Bakıda səfərdə olan Təbrizin “Barış” etno-rok musiqi qrupunun solisti və rəhbəri Məsud Barış AZƏRTAC-ın qonağı olub. İranlı ifaçının paytaxtımıza səfərinin əsas məqsədi azərbaycanlı bəstəkar Tural Məmmədli ilə birgə ərsəyə gətirdiyi “Zirvəyə doğru” diskinin təqdimatı ilə bağlıdır.
AZƏRTAC xəbər verir ki, yanvarın 24-də Bakıda təqdimatı keçiriləcək diskə 11 mahnı daxil edilib. Hər iki müəllifin bəstələrinin yer aldığı diskdəki ifalar Məsud Barışa məxsusdur.
Azərbaycanlı bəstəkarla ilk iş birliyi olan albomdan bəhs edən Məsud Barış deyib: “Əsasən vokal ifaçısı kimi tanınsam da, Tural Məmmədlinin bəstələri çox xoşuma gəldi. İnanıram ki, diskdə yer alan mahnılar dinləyicilərin ürəyincə olacaq. Bu diskdə müasir dünyada dinləyici zövqünə yaxın olan, melomanları özünə cəlb edə bilən xeyli mahnı var”.
Bakıda bir neçə dəfə musiqisevərlər qarşısında çıxış etdiyini söyləyən iranlı soydaşımız gənc bəstəkar Tural Məmmədlinin təqdimatında paytaxtımızda yeni bir konsert proqramı ilə çıxış etmək niyyətində olduğunu söyləyib.
Azərbaycana olan sonsuz sevgisini gizlətməyən Məsud Barış Bakıda aldığı təhsil və ötən illər ərzində rəhbərlik etdiyi “Barış” etno-rok musiqi qrupunun qazandığı uğurlardan da danışıb: “Bakıya gəlişim adi bir təsadüf nəticəsində baş verdi. Bir neçə il əvvəl Azərbaycanın görkəmli vokal ustası Lütfiyar İmanov Təbrizdə konsert verərkən səhnəni yerli ifaçılarla bölüşürdü. O, çox ifaçını dinləsə də, mənə üstünlük verərək dedi: “Sən mənin gəncliyimi xatırladırsan”.
Onunla birgə konsert verdik. Lütfiyar müəllimin dəvəti ilə ilk dəfə Bakıya gəldim, burada bir il ondan sənətin sirlərini öyrəndim. Görkəmli vokalçının qəfil itkisi məni çox kədərləndirdi. Onunla başladığım işi yarımçıq qoymayacağıma və vokal sənətinə tam yiyələnəcəyimə söz verdim. Elə bu istəklə də Bakıda Azərbaycan Dövlət Konservatoriyasında klassik vokal sənəti üzrə təhsil aldım, görkəmli pedaqoqlardan dərs alaraq sənətin sirlərinə yiyələndim. Əlbəttə ki, yüksək təhsil görmədən peşəkar səviyyəyə yüksəlmək mümkünsüzdür. Dahi Üzeyir Hacıbəyli olmaqla demək olar ki, bütün klassik bəstəkarların yaradıcılığından bəhrələnməyə çalışıram. Xüsusilə, professor Qara Qarayevin yaradıcılığını özüm üçün təməl hesab edirəm. Bəlkə də bunun nəticəsidir ki, yaradıcılığımda digər janrlarla yanaşı klassik əsərlər də mühüm yer tutur”.
“Mən klassik musiqi təhsili almışam, Avropa klassiklərinin əsərlərini ifa etməyi öyrənmişəm. Amma bizim cəmiyyətdə pop və rok musiqisi çox sevilir. Boşluğun yaranmamasına görə çalışıram ki, klassik rokun sintezindən elə bir musiqi yaransın ki, həm gənclərin zövqünü oxşasın, həm də milli üslubu insanlara çatdıra bilək”,- deyə Məsud Barış vurğulayıb.
Təbrizdə rəhbərlik etdiyi musiqi məktəbində 300-dən çox şagirdin təhsil aldığını söyləyən musiqiçi deyib: “İranda musiqi təhsili almağa böyük maraq var. Məktəbdə gənclərlə yanaşı, yuxarı yaşda olan tələbələr də var. Burada klassik, eləcə də Azərbaycan və İran musiqisini təxminən 30 müəllim tədris edir. Pedaqoqların əksəriyyətinin peşəkar musiqiçilər olması gələcəkdə tələbələrin arasından çoxlu istedadlar yetişəcəyinə ümid yaradır”.
Məsud Barış bədii rəhbəri olduğu “Barış” etno-rok musiqi qrupunun uğur və planlar barədə də məlumat verib. Tatarıstanın paytaxtı Kazan şəhərində türkdilli ölkələr arasında keçirilən “Türkvision 2014” mahnı müsabiqəsinin finalında onun rəhbərlik etdiyi musiqi qrupunun çıxışını tamaşaçılar heyranlıqla dinləyiblər. Qrup təkcə İranda deyil, Azərbaycan, Türkiyə və Mərkəzi Asiya ölkələrində də populyarlıq qazanıb. Birləşmiş Ştatların bir sıra şəhərində, o cümlədən Virciniya ştatında və San-Fransiskoda konsert proqramı ilə çıxış edib. “Barış” qrupu Türkiyənin Ankara, İstanbul və digər şəhərlərində konsert proqramı ilə çıxış etməyi nəzərdə tutub.
Ümumilikdə 50-dən çox əsərin müəllifi olan Məsud Barışın musiqi albomlarına həm simfonik, həm simli orkestr, tamaşa, simli kvartet, ansambllar, solo alətlər üçün əsər və mahnılar daxildir. Onun yaradıcılıq məhsullarının ifaçıları arasında kifayət qədər tanınmış simalar var. Əsərləri bir çox festivallarda uğur qazanan sənətkarın bəstələri Bakıda “Gəncliyin səsi” incəsənət festivalında, ABŞ-ın Texas ştatında, eləcə də Vyana, Budapeşt, Balatonfuret, Valetta, Moskva, İstanbul, Tehran və digər şəhərlərdə səslənib.
Təqdimatı keçiriləcək diskin müəlliflərindən biri Tural Məmmədli musiqilərin yazılışının ölkəmizdə hazırlandığını və bədi rəhbər olduğu “Etno-klass” instrumental ansamblının istedadlı musiqiçilərinin müşayiəti ilə ərsəyə gəldiyini söyləyib.
Təqdimat mərasimindən sonra Azərbaycanda və dünyanın müxtəlif ölkələrində iranlı musiqiçi ilə birgə konsert proqramı ilə çıxış etmək barədə planlarından danışan gənc bəstəkar Tural Məmmədli deyib: “Biz birgə yaradıcılıq məhsulu olan əsərləri geniş musiqisevərlər auditoriyasına təqdim etmək istəyirik. Hazırda növbəti albom üzərində işləyirik. Həmçinin Bakıda tamam yeni və orijinal formatda konsert verməyi düşünürük”.
Onu da qeyd edək ki, Tural Məmmədli ilə Məsud Barışın daha bir uğurlu layihəsi Təbrizin 2018-ci il “İslam ölkələrinin turizm paytaxtı” seçilməsindən sonra həyata keçib. Təbrizdə keçirilən təntənəli açılış mərasimində səslənən himnin müəllifi də Tural Məmmədli olub.
Bölmənin digər xəbərləri
