Ziya Əliyev: Daşınmaz əmlak sığortası sahəsində şərtlərin xeyli yaxşılaşdırılmasına ehtiyac var
Bakı, 22 may, AZƏRTAC
Daşınmaz əmlak sığortası ölkəmizdə 10 ilə yaxın bir dövrdə icbari şəkildə tətbiq olunmaqdadır. Lakin bu sahədə qanunvericiliyin və sığorta şərtlərinin xeyli yaxşılaşdırılmasına ehtiyac var.
AZƏRTAC xəbər verir ki, bunu Mərkəzi Bankın (AMB) baş direktoru Ziya Əliyev Bakıda keçirilən “Katastrofik risklərə qarşı dayanıqlı maliyyə sistemi konfransı”nda deyib.
O bildirib ki, hazırda Mərkəzi Bank xarici və yerli təcrübələrə əsaslanaraq bu sığorta sinfi üzərində sektorla birlikdə ciddi və intensiv müzakirələr aparmaqdadır.
“Mərkəzi Bank sığorta sahəsində requlyator olduqdan sonra onun inkişafı uçün böyükölçülü strategiya həyata keçirməkdədir. Ən əsas strateji məqsədlərimizdən biri sığorta bazarına inamı gücləndirməkdir. Bunun üçün ötən dövrdə sığortaçıların həm maliyyə dayanıqlığına, həm də sığortalılara qarşı rəftarına münasibətdə nəzarət gücləndirilib. Tələblərə cavab verməyən sığortaçılar qanun çərçivəsində bazardan kənarlaşdırılıb. Sığortaçılar üzrə hər ay şikayət indeksi hesablanıb ictimaiyyətə yayımlanır”, - deyə Z.Əliyev qeyd edib.
Z.Əliyev əlavə edib ki, sığortaçılarda idarəetmənin çağdaş təcrübələrə yaxınlaşdırılması üçün korporativ idarəetmə standartları tətbiq olunmağa başlayıb: “Sektorun satış, anderraytinq, zərərlərin tənzimlənməsi sahəsində xidmətlərin keyfiyyətinin artırılması üçün onların etibarlı məlumat layihələri həyata keçirilir. Əhalinin və iş adamlarının sığorta fərqindəliyini yüksəltmək üçün artıq dördüncü ildir ki, geniş ölçüdə maarifləndirmə layihəsi həyata keçilir. İnsanlar getdikcə sığorta məhsullarını, onların faydalarını daha yaxşı təsəvvür etməyə başlayıblar. Ölkədə sığortanın dağılım kanallarının genişləndirilməsi üçün də sektorla bərabər mühüm işlər aparırıq. Sığorta agentlərinin yeni nəslinin yetişdirilməsi diqqətimizdədir. “Bankassurance” kanalının genişlənməsi üçün banklarla və sığortaçılarla birlikdə çalışırıq. Bu yaxınlarda bank müştərilərinin həyat sığortasının genişləndirilməsi üçün yeni tənzimləmələr gətirəcəyik”.
Bölmənin digər xəbərləri
