Builki “Caspian Oil and Gas” sərgisində 300-dən çox şirkət iştirak edəcək YENİLƏNİB VİDEO
Bakı, 24 may, AZƏRTAC
Builki “Caspian Oil and Gas” sərgisində 38 ölkədən 312 neft-qaz şirkəti iştirak edəcək.
AZƏRTAC xəbər verir ki, bu barədə mayın 24-də XXV yubiley Beynəlxalq Xəzər Neft və Qaz “Caspian Oil and Gas 2018” sərgi-konfransının, eləcə də VIII Xəzər Beynəlxalq Energetika və Alternativ Enerji “Caspian Power 2018” sərgisinin açılışına həsr olunan mətbuat konfransında “Iteca Caspian” şirkətinin prezidenti Fərid Məmmədov deyib.
O bildirib ki, Xəzər regionunda enerji sektorunun ən böyük tədbiri olan “Caspian Oil and Gas” sərgi və konfransı öz 25 illik yubileyini qeyd edir. Sərgi mayın 29-dan iyunun 1-dək Bakı Ekspo Mərkəzində keçiriləcək. “Caspian Oil and Gas” əsas neft-qaz layihələrinin müzakirəsi, həmçinin neft və qaz hasilatı, emalı, nəqliyyat, logistika və xidmət sahələrində qabaqcıl texnologiyaları nümayiş etdirmək üçün ən yüksək səviyyəli rəhbər və mütəxəssislərini araya gətirəcək. Belarus, İtaliya və Rusiya sərgidə milli qruplarla təmsil olunacaq. Sərginin tərkibi tədbir iştirakçılarının 20 faizini təşkil edən yeni şirkətlər sayəsində daha da genişlənib. Bu yeni iştirakçıların əksəriyyəti Azərbaycanın neft və qaz bazarına böyük maraq göstərən xarici şirkətlərdir. Həmçinin sərgi iştirakçılarının 30 faizini təşkil edən yerli şirkətlər arasında da debütantlar var: “Caspian Oil and Gas” sərgisinin yubileyi ümummilli lider Heydər Əliyevin anadan olmasının 95 illik və Azərbaycan Xalq Cümhuriyyətinin 100 illiyi kimi əhəmiyyətli tarixi hadisələrə təsadüf edir”.
SOCAR-ın ictimaiyyətlə əlaqələr və tədbirlərin təşkili idarəsinin rəis müavini İbrahim Əhmədov isə qeyd edib ki, şirkət ənənəvi olaraq sərgi-konfransı dəstəkləyir və burada yüksək səviyyədə təmsil olunur: “Beynəlxalq şirkətə çevrilən SOCAR Azərbaycan xam neftindən əlavə, üçüncü tərəflərin xam neft və neft məhsullarının satışını həyata keçirir. Şirkət xam neft və neft məhsullarının ümumi ticarət həcmini 2 dəfədən çox, üçüncü tərəflərin məhsullarının satış həcmini isə 3 dəfəyə qədər artırıb. SOCAR-ın gəlirlərinin 90 faizdən çoxu xarici biznesi sayəsində formalaşır”.
Məlumat verilib ki, keçirildiyi illər ərzində sərgidə dünyanın 70-dən çox ölkəsini təmsil edən təxminən 7 min 500 şirkət iştirak edib. Sərginin 40 faizini ənənəvi olaraq sərgi və konfransın daimi iştirakçıları olan tanınmış dünya şirkətləri tutur. Builki sərgi dolğun işgüzar proqramı ilə fərqlənir. Sərginin ikinci iş günündə Bakı Ekspo Mərkəzində bir gün ərzində bir neçə əsas müştəri ilə işgüzar görüşlər keçirmək və danışıqlar aparmaq üçün əlavə fürsət - “B2B” formatlı görüşlər keçiriləcək. Bu görüşlərdə həm xarici, həm də yerli istehsalçılar iştirak edəcəklər. Sərginin işgüzar proqramını neft-qaz sənayesi təmsilçilərinin geniş dairəsi üçün aktual olan seminarlar tamamlayacaq. Belə ki, mayın 30-da Bakı Ekspo Mərkəzində “Neft-qaz layihələrində avtomatlaşdırma mühəndisinin rolu” (“INKOEL” şirkəti), “TOFD metodu - personalın sertifikatlaşdırılmasının əsas prinsip, standart və üstünlükləri” (“UP Belqazpromdiaqnostika” şirkəti) “Avtomatik qaynaq kompleksləri” (“Magnatech” şirkəti) və “Passiv yanğından mühafizə tədbirləri” (“Graco” şirkəti) mövzularında seminarlar keçiriləcək.
Bildirilib ki, sərginin yubileyi münasibətilə neftçi peşəsini seçmiş ən yaxşı tələbələri mükafatlandırılır. Bu il eyni anda iki tələbə “Caspian Oil and Gas” sərgisindən xüsusi mükafat alacaqlar. Onlar Bakı Ali Neft Məktəbinin sənaye hasilatının avtomatlaşdırılması fakültəsinə qəbul zamanı 700 bal toplamış Abdulla Əsgərzadə və Mahirə Əsədzadədir. Sərgidə uzun illər iştirak etmiş bütün şirkətlərə xatirə suvenirləri təqdim olunacaq. Xüsusi olaraq müstəqil Azərbaycanın ilk beynəlxalq ixtisaslaşmış sərgi və konfransının 25 illik yubileyi münasibətilə unikal poçt markaları buraxılıb. Sərgilərə həsr olunmuş markalar Azərbaycanda ilk dəfə nəşr olunur. Marka növlərindən birində sərginin yubiley loqotipi və simvolik neft platformasını təsvir edilib. İkinci marka növü isə Xəzər dənizinin sahilində Bakını təsvir edən rəsm əsərinin reproduksiyasıdır. Təşkilatçılardan daha bir suvenir yubiley münasibətilə xüsusi olaraq hazırlanmış “Caspian Gold” ətri olacaq. Kişi və qadınlar üçün nəzərdə tutulmuş “Caspian Gold” parfüm suyu Azərbaycan ətriyyatçıları tərəfindən hazırlanıb və Şərqin ədviyyəli ətirlər qrupuna daxildir. “Caspian Gold” məhdud sayda hazırlanıb.
Qeyd edilib ki, mayın 30-31-də keçiriləcək “Caspian Oil and Gas” konfransı isə aparıcı enerji və neft-qaz şirkətlərinin rəhbərini, eləcə də sənaye nazirliklərinin nümayəndələri və nüfuzlu sənaye mütəxəssislərini bir araya toplayacaq və neft-qaz sənayesinin inkişafı üzrə aktual məsələlərin müzakirəsi üçün imkanlar yaradır. “Caspian Oil and Gas” sərgi-konfransı Azərbaycanın Energetika Nazirliyi və SOCAR-ın dəstəyi, “Iteca Caspian” və “ITE Group” şirkətlərinin təşkilatçılığı ilə keçiriləcək.
Bildirilib ki, “Caspian Power 2018” sərgisi “Caspian Oil and Gas” sərgisi ilə eyni platformada keçiriləcək. Sərginin aktuallığı Azərbaycanda yeni elektrik stansiyaları və hibrid elektrik stansiyalarının fəaliyyətə başlaması, eləcə də külək turbinləri və günəş batareyalarının quraşdırılması ilə şərtləndirilir. “Caspian Power” sərgisi Energetika Nazirliyi və Alternativ və Bərpa Olunan Enerji Mənbələri üzrə Dövlət Agentliyi tərəfindən dəstəklənir. Bu sərginin iştirakçıları arasında Azərbaycan, Belarus, Türkiyə və digər ölkələrin energetika texnologiyaları üzrə aparıcı təchizatçı şirkətləri var. Sərginin ekspozisiyası çərçivəsində su və istilik elektroenergetikası, atom energetikası, eləcə də, nəzarət, ölçmə, idarəetmə və avtomatik nizamlama cihazları, habelə sənaye və kommunal-məişət energetikası, enerjiyə qənaət edən texnologiyalar, radio-tezlik kabelləri, sənaye avtomatlaşdırılması üçün kabellər və sair təqdim olunacaq.
“Caspian Power 2018” sərgisi elektrik enerjisi sənayesinin aparıcı təmsilçiləri ilə görüşmək, ən son texnoloji məhsullar və elektroenergetika sahəsinin inkişaf strategiyası ilə bağlı məlumat toplamaq, yeni səmərəli və qarşılıqlı faydalı əlaqələr qurmaq və mövcud əlaqələri genişləndirmək, habelə perspektiv müqavilələr imzalamaq üçün unikal imkan yaradacaq.
Bölmənin digər xəbərləri
