Kiçik və orta sahibkarlığın inkişafına dövlət dəstəyi - Masallı Sənaye Məhəlləsindən REPORTAJ VİDEO
Masallı, 30 may, İsmayıl Cəfərli, AZƏRTAC
Ölkəmizdə müasir texnika və texnologiyalarla məhsul istehsal edən texnoparkların və sənaye məhəllələrinin yaradılmasında məqsəd iqtisadiyyatın şaxələndirilməsi, bazara rəqabətqabiliyyətli məhsulun çıxarılması, yeni iş yerlərinin açılmasıdır. İndi respublikamızın bir sıra regionlarında texnoparklarla yanaşı, sənaye məhəllələri də fəaliyyət göstərir. Dövlət investisiyası ilə salınan bu sənaye məhəllələrinin hesabına ölkəmizdə kiçik və orta sahibkarlığın inkişafı üçün əlverişli şərait yaranıb, əhalinin istehsal və xidmət sahəsində məşğulluğu daha da artıb. Artıq Neftçala və Masallı sənaye məhəllələri sahibkarların istifadəsinə verilib. Hacıqabulda demək olar ki, işlər tam yekunlaşıb, Sabirabadda isə tikinti davam edir.
AZƏRTAC xəbər verir ki, 2018-ci ildə Prezident İlham Əliyevin xeyir-duası ilə istifadəyə verilən, ümumi sahəsi 10 hektar olan Masallı Sənaye Məhəlləsində əvvəl 8, indi isə müxtəlif istehsal sahələri üzrə 10 müəssisə fəaliyyət göstərir. Burada mebel, uşaq və mətbəx mebelləri, döşək, dam örtükləri və aksessuarları, dəmir məmulatları, plastik-alüminium qapı-pəncərə istehsal olunur.
Məhəllədə yaradılan istehsal sahələrindən biri də taxta emalı və məmulatları müəssisəsidir. Sahibkar Əziz Əzizov istehsal etdikləri məhsulu yerli bazara çıxarır: “Məhsullarımız Azərbaycanın bütün rayonlarına satışa göndərilir. Öz rayonumuzdan işçi cəlb etmişik. Hazırda 11 işçimiz var. Xammal isə Rusiyadan gəlir. Tələbat olduğuna görə, istehsalı bu yaxınlarda daha da artıracağıq. İşçilərimizin sayı da 20-yə çatacaq”.
Müəssisədə işlə təmin olunanların əksəriyyəti ətraf kəndlərin sakinləridir. Masallı Sənaye Məhəlləsində fəaliyyət göstərən istehsal müəssisələrində Seymur Şirməmmədov kimi yüzdən çox gənc çalışır. Azərbaycan brendi ilə istehsalımıza töhfə verən bu gənclər uzaq məsafə qət etmədən elə yaşadıqları rayonda işlə təmin olunublar: “Müəssisə ilə evimiz arasında cəmi 3-4 kilometr məsafə var. İşə maşınla gəlib-gedirik. Müəssisəmizdə mətbəx mebeli düzəldirik. Ölçüsündən asılı olaraq bir mebeli 1-2 günə hazır edirik”.
İşçi Niyaməddin Səlimli isə deyir ki, evlərimizin daha gözəl görünməsində xüsusi payı olan bu dam örtükləri milli istehsalımızdır. Masallı Sənaye Məhəlləsində yaradılmış bu müəssisədə keyfiyyətli və rəngbərəng dam örtükləri istehsal olunur: “Müxtəlif rənglərdə sifarişlərimiz olur. Dam örtüklərini istənilən ölçüdə kəsib müştərilərə göndəririk. Məndən başqa 4 işçi də var”.
Döşək və metal yay hissələri istehsal edən, illik dövriyyəsinin həcmi 3 milyon manat nəzərdə tutulan digər müəssisənin məhsulları da yüksək keyfiyyəti ilə seçilir. Uşaq və mətbəx mebeli sexində iş icraçısı olan Mürvət Abdullayev bildirir ki, istehsal etdikləri malı xarici bazara çıxarmaq niyyətindədirlər. “Hazırda 6 nəfərlə çalışırıq. Məhsullarımız daxili bazarlarda satılır. Bir aya 100 dəst mebel istehsal edirik. Gələcəkdə xarici bazarlara da ixrac etməyi nəzərdə tutmuşuq”, - deyə o qeyd edib.
Bundan başqa, Masallı Sənaye Məhəlləsində yumşaq mebellər, stol-stullar istehsal edən müəssisələr də fəaliyyət göstərir. İstehsal olunan mebellər burada fəaliyyət göstərən sərgi zalında nümayiş etdirilir. Hazırda 140 nəfərin işlə təmin olunduğu Masallı Sənaye Məhəlləsində gələcəkdə fəaliyyət sahələrinin genişləndirilməsi, istehsalın artırılması ilə burada çalışanların sayı 200 nəfərdən çox olacaq.
Qeyd edək ki, Masallı Sənaye Məhəlləsi Prezident İlham Əliyevin müvafiq Sərəncamı əsasında yaradılıb. Dövlətimizin başçısı 2018-ci ilin sentyabrında cənub bölgəsinə səfəri çərçivəsində Masallı Sənaye Məhəlləsinin açılışında iştirak edib.
Bölmənin digər xəbərləri
