ADEX Azərbaycanın müdafiə sənayesinin imkanlarını nümayiş etdirən strateji platformadır ŞƏRH
Bakı, 1 oktyabr, AZƏRTAC
Bakıda keçirilən “ADEX 2026” 6-cı Azərbaycan Beynəlxalq Müdafiə Sərgisi və “Securex Caspian” 15-ci Beynəlxalq Daxili Təhlükəsizlik, Mühafizə və Xilasetmə Avadanlıqları Sərgisi Azərbaycanın müdafiə sənayesi və hərbi-texniki əməkdaşlıq sahəsində mövqeyinin daha da möhkəmləndiyini nümayiş etdirir. ADEX artıq yalnız hərbi texnika və silah nümunələrinin nümayiş etdirildiyi sərgi deyil, həm də dövlətlər, hərbi nümayəndə heyətləri, müdafiə sənayesi şirkətləri və texnologiya istehsalçıları arasında əməkdaşlıq üçün mühüm platformaya çevrilib. Budəfəki sərgidə iştirakın miqyası da bunu təsdiqləyir. ADEX və “Securex Caspian” çərçivəsində 30 ölkədən 277 şirkət və təşkilat iştirak edir, 14 ölkə milli pavilyonla təmsil olunur.
Bunu AZƏRTAC-a açıqlamasında Milli Məclisin deputatı Vüqar İskəndərov bildirib.
Onun sözlərinə görə, ADEX-in bu səviyyəyə yüksəlməsi onun artıq Azərbaycanın milli brendlərindən birinə çevrildiyini göstərir. Sərginin hər dəfə daha geniş coğrafiyanı əhatə etməsi Azərbaycanın hərbi-texniki əməkdaşlıq imkanlarına beynəlxalq marağın artdığını göstərən amillərdən biridir. Bu baxımdan ADEX Azərbaycanın həm öz müdafiə sənayesi məhsullarını təqdim etdiyi, həm də dünya müdafiə sənayesindəki yeni texnologiyaları izlədiyi və potensial tərəfdaşlarla birbaşa əlaqələr qurduğu mühüm platformadır.
“Burada əsas məsələ yalnız nümayiş deyil. Belə sərgilər yeni müqavilələrin müzakirəsi, texnologiya və təcrübə mübadiləsi, birgə istehsal imkanlarının araşdırılması və müdafiə sənayesi müəssisələri arasında uzunmüddətli əməkdaşlıqların formalaşdırılması baxımından əhəmiyyətlidir. Azərbaycanın ADEX-i təşkil etməsi ölkənin regionda hərbi-texniki əməkdaşlıq baxımından artan rolunu da nümayiş etdirir”, - deyə V.İskəndərov bildirib.
Deputat hesab edir ki, müdafiə sənayesinin inkişafına yalnız iqtisadi kateqoriya kimi yanaşmaq düzgün olmazdı. Müasir dövrdə qlobal təchizat zəncirlərində yaranan problemlər, geosiyasi gərginliklər, ixrac məhdudiyyətləri və müxtəlif sanksiya rejimləri ölkələrin müdafiə sahəsində öz istehsal imkanlarına malik olmasının əhəmiyyətini artırır. Öz müdafiə sənayesinin olması dövlətə yalnız müəyyən silah və texnikanı daxili resurslar hesabına istehsal etmək imkanı vermir. Bu, eyni zamanda, texnoloji kompetensiyaların, mühəndislik məktəbinin, istehsal infrastrukturunun və ixtisaslı kadr potensialının formalaşmasına şərait yaradır. Daha vacibi isə ordunun ehtiyaclarının dəyişən şərtlərə uyğun operativ şəkildə qarşılanması və mövcud məhsulların təkmilləşdirilməsi üçün milli baza yaradır.
V.İskəndərov Azərbaycanın müdafiə sənayesinin inkişafında Vətən müharibəsinin də xüsusi mərhələ olduğunu qeyd edib. Onun sözlərinə görə, yerli istehsalın müxtəlif nümunələrinin real döyüş şəraitində tətbiqi onların sınaqdan keçirilməsi, aşkar edilmiş çatışmazlıqların aradan qaldırılması və yeni məhsulların hazırlanması üçün mühüm təcrübə bazası yaradıb. Real döyüş şəraitində əldə olunan təcrübə hərbi texnologiyaların inkişafı baxımından son dərəcə əhəmiyyətlidir.
“Azərbaycanın müdafiə sənayesinin inkişafı “Made in Azerbaijan” brendinin yeni istiqamətlər üzrə genişlənməsi baxımından da əhəmiyyətlidir. Müdafiə təyinatlı məhsulların xarici bazarlara çıxarılması ölkənin istehsal və ixrac imkanlarının genişləndirilməsi ilə yanaşı, Azərbaycan şirkətlərinin beynəlxalq müdafiə sənayesi ekosisteminə daha fəal inteqrasiyasına imkan yaradır. Bu prosesdə beynəlxalq öhdəliklərə və ixrac nəzarəti mexanizmlərinə riayət edilməsi xüsusi əhəmiyyət daşıyır. Azərbaycanın hərbi məhsulların ixracında müvafiq beynəlxalq tələbləri, sanksiyaları və ixrac nəzarəti rejimlərini nəzərə alması uzunmüddətli və şəffaf tərəfdaşlıq üçün mühüm amildir. Belə yanaşma müdafiə sənayesinin inkişafını yalnız satış həcmləri ilə deyil, həm də etibarlı və məsuliyyətli tərəfdaşlıq prinsipləri ilə əlaqələndirməyə imkan verir”, - deyə deputat vurğulayıb.
O, ADEX-in gələcəkdə Azərbaycan müdafiə sənayesinin yeni mərhələyə keçidi üçün də mühüm platforma olaraq qalacağını bildirib. Onun sözlərinə görə, müasir müdafiə sənayesində pilotsuz sistemlər, süni intellekt, elektron müharibə, robototexnika, kibertəhlükəsizlik və yüksək dəqiqlikli sistemlər kimi istiqamətlər getdikcə daha çox əhəmiyyət qazanır. Buna görə də Azərbaycanın qarşısında duran əsas məsələlərdən biri mövcud istehsal imkanlarını genişləndirməklə yanaşı, yüksək texnologiyalı və daha çox əlavə dəyər yaradan məhsulların hazırlanmasıdır.
“Bu baxımdan ADEX-in əhəmiyyəti təkcə sərgi günləri ilə məhdudlaşmır. Burada qurulan əlaqələr, aparılan müzakirələr və əldə olunan razılaşmalar sonrakı dövrdə yeni birgə layihələrə, texnologiya transferinə, investisiyalara və məhsulların təkmilləşdirilməsinə çevrilə bilər. ADEX-in milli brend kimi möhkəmlənməsi Azərbaycanın müdafiə sənayesinin beynəlxalq təqdimatı baxımından strateji əhəmiyyət daşıyır”, - deyə V.İskəndərov əlavə edib.
Bölmənin digər xəbərləri
