Rusiya sərhədi istiqamətində yeni yolun tikintisi davam edir VİDEO
Bakı, 3 iyun, AZƏRTAC
“Şimal-Cənub” beynəlxalq nəqliyyat dəhlizinin tərkib hissəsi olan M-1 Bakı-Quba-Rusiya ilə dövlət sərhədi yeni avtomobil yolunun H.Z.Tağıyev qəsəbəsindən başlayaraq tikilməsi ilə bağlı Prezident İlham Əliyevin imzaladığı Sərəncama əsasən, tikinti işləri Azərbaycan Avtomobil Yolları Dövlət Agentliyi tərəfindən sürətlə və keyfiyyətlə davam etdirilir.
Agentliyin İctimaiyyətlə əlaqələr şöbəsindən AZƏRTAC-a bildirilib ki, M-1 Bakı-Quba-Rusiya ilə dövlət sərhəi avtomobil yolunun 45-ci kilometrliyindən, H.Z.Tağıyev qəsəbəsindən başlayan və 92 kilometr olan yol 1b texniki dərəcəyə uyğun olaraq inşa edilir. Dörd hərəkət zolaqlı olacaq yolun hər bir zolağının və çiyinlərin eni 3,75 metr, ayırıcı zolağın eni 5 metr olmaqla yol yatağının eni 27,5 metr təşkil edəcək. Yola hər hansı maneənin çıxmasının qarşısını almaq məqsədilə körpü və birləşmələrin, alt keçid, suötürücü boruların, işıqlandırma işlərinin, ayrıcı zolaqda beton çəpərlərin, beton bardyurların quraşdırılması, ekoloji və ətraf mühitin qorunması tədbirlərinin görülməsi və yolun hər iki tərəfdən çəpərlənməsi (təhkim zolağının eni 72,5 metr olmaqla) nəzərdə tutulur.
Yeni magistral yolun keçdiyi ərazi Xəzər sahiliboyu Samur-Dəvəçi ovalığından yerləşir əsasən yaşayış məntəqələrindən və sənaye müəssisələrindən kənardadır. Əsas qəsəbə və rayon mərkəzlərindən isə magistrala giriş-çıxış yolları çəkiləcək. Tikiləcək yolun ətraf mühitə, o cümlədən faunaya mənfi təsirini azaltmaq məqsədilə heyvanlar üçün yolaltı keçidlərin tikintisi və səsboğucu qurğuların quraşdırılması nəzərdə tutulur.
Layihə 4 lotdan ibarətdir. Birinci lot yeni yolun 0-29,9, ikinci 29,9-53,5, üçüncü 53,5-73,5, dördüncü lot isə 73,5-92-ci kilometrlik hissələri əhatə edir. Hazırda işlər 1-ci və 2-ci lot üzrə aparılır. Layihənin və 1-ci lotun başlanğıcı mövcud M-1 Bakı-Quba-Rusiya ilə dövlət sərhədi avtomobil yolunun 45-52-ci kilometrlik (7 kilometr) hissəsinə düşməklə tikinti işləri yeni yolun 30-cu kilometrinə kimi aparılır.
Aparılan tikinti işləri çərçivəsində beton yolda mövcud sement-beton örtüyü sökülüb sahədən kənarlaşdırılıb, köhnə asfalt frezlənib. Həmçinin layihəboyu yararsız material qazılıb çıxarılıb, geri dolğu işləri aparılıb, beton yolda, həmçinin yeni yolun qruntun zəif olduğu yerlərində qaya dolğu işləri görülüb.
Beton yolda yol geyiminin tikintisi işləri artıq yekunlaşmaq üzrədir. Belə ki, yol geyimi üst qatına qədər tikilib. Yeni layihələndirilən yolun isə 7-10, 25-29-cu kilometrlik hissələrində hamarlayıcı lay, əsas lay və asfalt-beton örtüyün 1-ci qatı tikilib. Layihə üzrə nəzərdə tutulmuş suötürücü və ehtiyat boruların 305 poqonmetri artıq quraşdırılıb, kommunikasiya xətlərinin köçürülməsi isə 98 faiz yerinə yetirilib.
Layihənin 2-ci lotu üzrə hazırda işlər yolun 30-38 və 41-47-ci kilometrlik hissəsində aparılır. Yararsız material qazılıb çıxarılır, geri dolğu işləri aparılır, qruntun zəif olduğu yerlərində qaya dolğu işləri görülür. Yeni magistral yolun sözügedən hissəsində artıq 28 suötürücü boru və 1 yeraltı keçid inşa edilib, 2 borunun tikintisi və 4 tunelin inşası isə davam edir.
Qeyd edək ki, yeni yolun sözügedən hissələrində 2 yol qovşağı, 1 yol ötürücü, 1 kanal körpüsü, 9 avtomobil tuneli, 1 yeraltı keçid, 74 müxtəlif ölçülərdə düzbucaqlı və dairəvi beton suötürücü boruların tikintisi, meliorasiya xətləri ilə kəsişmələrdə müvafiq tədbirlərin görülməsi, müxtəlif gərginlikli elektrik-rabitə xətlərinin, su, beynəlxalq əhəmiyyətli qaz və neft xətlərinin köçürülməsi, yolun ayırıcı zolağında ümumilikdə cəmi 31 min poqonmetr beton baryerlərin tikilməsi nəzərdə tutulub.
Yeni inşa edilən yol 92 kilometr sonra hazırda I texniki dərəcəyə uyğun inşası aparılan və Şabran rayonu, Qəndob yaşayış massivindən Rusiya sərhədinədək uzanan 60 kilometrlik yola birləşəcək. Bununla da H.Z.Tağıyev qəsəbəsindən başlayaraq Rusiya ilə dövlət sərhədinə qədər uzanacaq yeni avtomobil yolunun uzunluğu 152 kilometr təşkil edəcək.
Ümumilikdə sözügedən hissədə 8 qovşaq və yol ötürücü körpünün, 16 hidravlik və kanal körpüsünün, kəndlərarası düzbucaqlı 2 yolaltı keçidin, 3 kiçik düzbucaqlı boru və 190 metr uzunluğunda müxtəlif diametrlərdə dairəvi beton suötürücü borular, həmçinin 2708 metr uzunluğunda, 500 millimetr diametrdə dəmir borular və digər beton qurğularının tikintisi, müxtəlif gərginlikli elektrik-rabitə xətlərinin, su, beynəlxalq əhəmiyyətli qaz və neft xətlərinin köçürülməsi nəzərdə tutulub ki, bu işlərin müəyyən hissəsi icra olunub.
Tikinti işləri layihənin 157-192 kilometrlik (35 kilometr) hissəsində görülüb və bu hissəsində qazma və dolğu işləri tamamlanıb. Bu hissədə yol geyimi işləri, yəni hamarlayıcı lay, əsasın alt layı və əsas lay işləri görülüb, asfalt-beton örtüyünün döşənməsi işlərinə başlanılıb. Paralel olaraq yolun 137-192 kilometrlik (55 kilometr) hissəsində layihə çərçivəsində həmçinin su ötürücü və drenaj işləri görülüb, alt və ehtiyat keçidləri tikilib. Hazırda ərazidə torpaq dolğusu işləri aparılır.
Bundan başqa, layihə çərçivəsində nəzərdə tutulan 24 körpüdən 6-da işlər tamamlanıb, 4 körpüdə tamamlanma işləri və 7-də isə geoloji qazınti işləri, svay vurma işləri və sair tikinti işləri qismən görülüb.
Yeni avtomobil yolunun tikilməsi nəqliyyat xidmətlərini daha da yaxşılaşdırılması ilə yanaşı, bölgədə turizmin inkişafına əlavə təkan verəcək, dəhlizlə yük və sərnişin daşımalarında əsas rol oynayaraq respublikamızın iqtisadi maraqlarına uyğun olaraq yüklərin, o cümlədən tranzit yüklərin daha geniş cəlb olunmasına, yük həcminin çoxalmasına və gəlirlərinin artmasına, ölkəmizin nəqliyyat infrastrukturunun inkişafına, yeni iş yerlərinin açılmasına, öz növbəsində, bir çox sosial problemlərin həllinə şərait yaradacaq.
Xatırladaq ki, 2017-ci il dekabrın 7-də Prezident İlham Əliyevin iştirakı ilə yeni avtomobil yolunun təməl qoyma mərasimi keçirilib.
Bölmənin digər xəbərləri
