2003-CÜ İLİN YAYI ALMANİYADA SON YÜZİLLİYİN ƏN İSTİ FƏSİLLƏRİNDƏN BİRİDİR

22.07.2003 [20:23]
Çap et
A⁺ A^-

Almaniyada görünməmiş istilər davam etməkdədir. Hidrometeoroloji proqnozlar mərkəzlərinin verdiyi məlumatlara görə, ölkənin cənub əyalətlərində istilik kölgədə 38-40, şimal əyalətlərində və Berlində 36-38 dərəcəyə çatmışdır. Almanlar təsdiq edirlər ki, 2003-cü ilin yayı son yüzilliyin ən isti fəsillərindən biridir.

İyulun 20-də faşizmə qarşı müqavimət hərəkatı qurbanlarının xatirəsinin 59-cu ildönümü çərçivəsində təşkil edilmiş hərbi paradı zamanı bundesver əsgərləri arasında istiyə tab gətirməyərək yıxılanlar və huşunu itirənlər olmuşdur.

Ölkənin televiziya kanalları xəbərlər proqramlarında vətəndaşları imkan daxilində qızmar günəş altına çıxmamağa çağırır, istiyə tab gətirmək üçün profilaktiki tədbirlər tövsiyə edirlər.

Qızmar hava ölkənin kənd təsərrüfatına da ciddi ziyan vurmuşdur. Mal-qara arasında tələfat artmış, fermer təsərrüfatlarında meyvə-tərəvəz, zəmilərdə taxıl məhsulları zay olmuşdur.

Meteoroloqlar isti qasırğalı və yağmurlu günlər vəd etsələr də, avqust ayında da havanın, əsasən, isti və yağmursuz keçəcəyi ehtimal olunur.