2018-ci il üzrə diaqnostik qiymətləndirmədə iştirak edəcək müəllimlərin nəzərinə!
Bakı, 3 may, AZƏRTAC
Cari ilin mayında Təhsil Nazirliyi tərəfindən müəllimlərin bilik və bacarıqlarının növbəti diaqnostik qiymətləndirilməsi keçiriləcək.
Nazirlikdən AZƏRTAC-a bildiriblər ki, qiymətləndirmədə aşağıda adıçəkilən kateqoriyaya aid şəxslər iştirak edə bilərlər:
- əsas iş yeri olaraq müddətsiz əmək müqaviləsi əsasında işləyən müəllimlər;
- gənclərin çağırışaqədərki hazırlıq rəhbərləri;
- direktor, direktor müavinləri;
- məktəbdənkənar və sinifdənxaric işlər üzrə təşkilatçılar;
- yerli təhsili idarəetmə orqanlarında dövlət qulluğu və metodist vəzifələrində çalışanlar.
Diaqnostik qiymətləndirmədə əvvəlki imtahanlarda aşağı nəticə göstərən, ikinci ixtisası üzrə tədris aparan, habelə daha öncə diaqnostik qiymətləndirmədən keçməyən şəxslər də iştirak edə bilərlər.
Müəllimlərin bilik və bacarıqlarının diaqnostik qiymətləndirilməsində yalnız təhsil sənədləri dövlət nümunəli olan və işə mövcud qaydaların tələblərinə uyğun qəbul olunmuş şəxslərin iştirakına icazə verilir.
Diaqnostik qiymətləndirmədə iştirak edəcək müəllimlərin elektron ərizələrinin sistemə daxil olunması mayın 3-dən 11-dək yerli təhsili idarəetmə orqanları tərəfindən həyata keçiriləcək. Bununla əlaqədar namizədlər həmin qurumlara müraciət edə bilərlər.
Hər hansı sual və ya müraciətlə bağlı Təhsil Nazirliyinin Telefon Məlumat Mərkəzi (“Qaynar xətt” xidməti, telefon: 146) və ya Təhsil İşçilərinin Peşəkar İnkişafı İnstitutunun İnsan Resursları Mərkəzi (012 430 52 78; 012 430 57 79) ilə əlaqə saxlamaq mümkündür.
Bölmənin digər xəbərləri
