“Cavabları görəndə təəccübləndim, bir az da özümlə fəxr etdim” – ölkə birincisi olan Ucar məktəblisi VİDEO
Ucar, 12 iyun, Rəşad Türkoğlu, AZƏRTAC
Ucar şəhər 2 nömrəli tam orta məktəbin şagirdi Fuad üçün imtahan nəticələri həm uğurlu, həm də fərqli olub. O, buraxılış imtahanında mümkün 300 baldan 282.3 bal toplayaraq rayon üzrə 4-cü, II ixtisas qrupu üzrə qəbul imtahanında isə mümkün 400 baldan 391.7 bal toplayaraq ölkə üzrə 1-ci yeri əldə edib. Beləliklə, Fuad Cənnətov ümumilikdə 674 balla ali məktəbə qəbul üçün ixtisas seçimi mərhələsinə buraxılıb.
AZƏRTAC-ın bölgə müxbiri Fuadla görüşüb, onu qazandığı bu uğur münasibətilə təbrik edib.
Qələbənin kölgəsində gizlənən böyük bir əzm var. Tələbə olmaq istəyən, böyük arzulara can atan yüzlərlə gəncin ən mühüm silahı – əzm, planlı çalışma və məqsədyönlülükdür. Elə Fuad da bunu deyir: “Məncə, uğur əldə etmək üçün planla çalışmaq lazımdır. Hər zaman öz üzərimdə işlədim, qarşıma məqsəd qoydum və həmin məqsədə doğru hərəkət etdim. Çoxları deyir ki, mobil telefon, sosial şəbəkələr bu uğura çatmağa mane olur. Amma mən heç vaxt sosial şəbəkələrə aludə olmadım. Telefonu və ətrafı bəhanə etmədim, əksinə, vaxtımı düzgün bölərək özümə sərf etdim. Geri baxanda düşünürəm ki, bu günə qədər keçdiyim yolun hər anı dəyərli imiş,” – deyə o, uğurunun sirrini bölüşür.
Respublika üzrə birinci olmaq Fuadın özü üçün də sürpriz olub. “Əvvəllər sınaq imtahanlarında da yüksək nəticələr alırdım, amma belə nəticə gözləmirdim. Cavabları görəndə sevindim, təəccübləndim və bir az da özümlə fəxr etdim”, – deyə o, təbəssümlə vurğulayır.
Bu uğurun arxasında təkcə Fuadın əzmi yox, valideynlərinin də dəstəyi dayanır. Oğlunun nə qədər çalışqan, əzmkar və məsuliyyətli olduğunu deyən Sevda ana, imtahan günü yaşadığı həyəcanı belə xatırlayır: “Blok imtahanı günü gecə yatmadım. Fuad qorxduğunu deyirdi, mən də narahat idim. Səhər onu yola salanda özümə toxtaqlıq versəm də, içimdə narahatlıq vardı. İmtahandan çıxanda “yaxşı yazmışam” dedi. Amma sonra başladı fikirləşməyə: “Görəsən, kodlaşdırmanı düz eləmişəm?”. Cavablar açıqlanan gün mənə zəng edib dedi ki, “ana, 391 bal!”. Elə sevindim ki, işdə idim, göz yaşlarımı saxlaya bilmədim”, – deyə ana duyğularını bölüşür.
Fuadın atası Əlikram kişi isə oğlunun uğur qazanmasında həm də valideyn-övlad münasibətlərinin önəminə toxunur: “Övladlarımızla dost kimi davranmaq lazımdır, onları sadəcə nəzarət etməklə deyil, sevgi ilə yönləndirmək vacibdir. Mən valideynlərə tövsiyə edərdim ki, övladları ilə aralarında dost kimi münasibət qursunlar və ona uyğun davransınlar. Biz bunun nəticəsini gördük,” – deyə o bildirir.
Ucar şəhər 2 saylı tam orta məktəb bu il də təhsil uğurları ilə yadda qalır. 755 şagirdin təhsil aldığı bu məktəb həm Azərbaycan, həm də rus bölmələrini əhatə edir. Məktəbdə təhsilin keyfiyyəti və nəticəyə yönəlik yanaşma sayəsində artıq neçə illərdir ki, uğurlu məzunlar yetişir. Bu il məktəbi bitirəcək 49 məzunun 14-ü qəbul imtahanlarında 200-dən artıq bal toplayaraq diqqətçəkən nəticələr göstərib. Təhsil müəssisəsinin rəhbərliyi isə bu nəticələri təkcə şagirdlərin deyil, həm də müəllim kollektivinin və valideynlərin birgə əməkdaşlığının bəhrəsi kimi dəyərləndirir.
“Məktəbimizin hər il uğurları olur. Bu il Fuad Cənnətov bizim qürurumuz oldu. Rus bölməsində təhsil alıb, dərs əlaçısı olub, fənn olimpiadalarında uğurla iştirak edib. 674 ballıq nəticə ilə ölkə birincisi olmaq hər şagirdə qismət olmur. Bu nəticə müəllim-valideyn-məktəb əməkdaşlığının təcəssümüdür,” – deyə direktor qeyd edir.
Hazırda ixtisas seçimi mərhələsinə hazırlaşan Fuad, maliyyə sahəsi üzrə ali təhsil almağı planlaşdırır. Qəbul imtahanlarında göstərdiyi yüksək nəticə isə onun uzun illər ərzində davamlı zəhmətinin və planlı hazırlığının göstəricisi, müəllimlərin səylərinin və ailə dəstəyinin birgə nəticəsidir.
Bölmənin digər xəbərləri
