Ağcabədidə müasir ailə-fermer təsərrüfatlarına güzəştli şərtlərlə 178 baş cins heyvan verilib VİDEO
Ağcabədi, 27 noyabr, Tahir Ağaməmmədov, AZƏRTAC
Cari ilin Azərbaycanda “Kənd təsərrüfatı ili” elan edilməsi ilə bağlı tədbirlər planına uyğun olaraq Ağcabədi, Bərdə və İmişli rayonlarında ətlik-südlük istiqamətli müasir ailə-fermer təsərrüfatlarının yaradılması üzrə pilot layihə həyata keçirilir. Pilot layihə Ağcabədi rayonunda 25, Bərdə rayonunda 26, İmişli rayonunda isə 18 ailə-kəndli təsərrüfatını əhatə edir. Layihəyə əsasən bu təsərrüfatlara lizinq yolu ilə 516 baş cins heyvanın verilməsi nəzərdə tutulur.
AZƏRTAC xəbər verir ki, Avstriyadan gətirilmiş 178 baş ətlik-südlük istiqamətli “Simmental” cinsli heyvanlar noyabrın 27-də Ağcabədi rayonunun Təzəkənd kəndində yaradılmış 25 ailə-fermer təsərrüfatına verilib. Bu münasibətlə keçirilən mərasimdə Kənd Təsərrüfatı Nazirliyinin, “Aqrolizinq” ASC-nin, Ağcabədi Rayon İcra Hakimiyyətinin nümayəndələri və fermerlər iştirak ediblər.
Ağcabədi Rayon İcra Hakimiyyətinin başçısı Şahin Məmmədov, “Aqrolizinq” ASC idarə heyətinin sədri Elşən Məmmədov və Kənd Təsərrüfatı Nazirliyi yanında Kənd Təsərrüfatı Layihələri və Kreditlərinin İdarə edilməsi üzrə Dövlət Xidmətinin müdir müavini Orxan Mikayıl çıxış edərək, Prezident İlham Əliyevin aqrar sahənin inkişafına göstərdiyi diqqət və qayğıdan, respublikamızda ərzaq təhlükəsizliyinin təmin edilməsi istiqamətində görülən işlərdən, dövlətimiz tərəfindən sahibkarlığın inkişafı üçün yaradılan güzəştlərdən danışıblar. Natiqlər pilot layihənin əhəmiyyətini yüksək qiymətləndirərək, fermerlərə uğurlar arzulayıblar.
Məlumat verilib ki, müasir ailə-fermer təsərrüfatlarının yaradılması layihəsinin məqsədi ailə-kəndli heyvandarlıq təsərrüfatlarında mövcud olan az məhsuldar heyvanları yüksək məhsuldar heyvanlarla əvəz etmək yolu ilə pay torpaqlarına malik ailələr üçün kiçikhəcmli, müasir quruluşlu heyvandarlıq təsərrüfatlarının yaradılmasının stimullaşdırılmasıdır.
Layihə çərçivəsində heyvanların saxlanılması üçün təsərrüfatlarda müasir tipli tövlələr tikilib, yem bazasının formalaşdırılması təmin olunub. Heyvanlardan əldə olunan ət və südün məhsuldarlığının yüksək olması üçün müvafiq qida rasionu tərtib edilib, qarğıdalıdan silos hazırlanması məqsədilə tədbirlər həyata keçirilib. Ailə-fermer təsərrüfatları müasir metodlarla qarğıdalı silosu hazırlanması vərdişlərinə yiyələnib. Fermerlər portativ sağım aparatları və yemi xırdalayaraq qarışdıran aqreqatlarla təmin ediliblər.
Cins heyvanlar hər ailəyə 5-10 baş olmaqla, lizinq yolu ilə güzəştli şərtlərlə verilib. Əldə olunan südün marketinqini təşkil etmək üçün süd qəbulu məntəqələri yaradılıb. Məntəqədə toplanmış və soyudulmuş süd emal müəssisələrinə satılacaq.
Bölmənin digər xəbərləri
