Kitabxana əməkdaşları “Ana dili – bizi birləşdirən ən böyük dəyər” adlı videomaterial hazırlayıb
Bakı, 1 avqust, AZƏRTAC
Cəfər Cabbarlı adına Respublika Gənclər Kitabxanası 1 avqust - Azərbaycan Əlifbası və Azərbaycan Dili Günü münasibətilə “Ana dili - bizi birləşdirən ən böyük dəyər” adlı videomaterial, biblioqrafik siyahı və “Doğma Azərbaycan dili” adlı ənənəvi kitab sərgisi hazırlanıb. Bu günün tarixindən, əhəmiyyətindən bəhs edən videoçarxda hər bir insan öz ana dilini yaxşı bilməli və onu qorumalı fikri rəhbər tutularaq, dilin dövlət dili statusuna yüksəlməsinin millətin öz taleyinə sahibliyinin, dövlət qurmaq və qorumaq qüdrətinin, eyni zamanda, dilinin zənginliyinin sübutu olması faktı diqqətə çatdırılıb.
AZƏRTAC xəbər verir ki, videoçarxda Azərbaycan Əlifbası və Azərbaycan Dili Gününün yaranma tarixindən, ölkəmizdə keçdiyi inkişaf mərhələsindən ətraflı bəhs edilib. Videomaterialda bu sahədə ümummilli liderimiz Heydər Əliyevin və Prezident İlham Əliyevin müdrik siyasətinə dair fikirlər, bu sahədə imzalanan qanun və sərəncamlar da öz əksini tapıb. Kitabxana əməkdaşları tərəfindən hazırlanan biblioqrafik siyahıda 1 avqust - Azərbaycan Əlifbası və Azərbaycan Dili Günü haqqında kitabların və son beş ildə kütləvi informasiya vasitələrində çap edilən məqalələrin siyahıları da təqdim edilib.
İstifadəçilər kitabxana əməkdaşları tərəfindən hazırlanan materiallarla kitabxananın rəsmi saytında tanış ola bilərlər.
Bölmənin digər xəbərləri
