Türkiyədə zəlzələ qurbanlarının sayı 17 min 134 nəfərə çatıb -YENİLƏNİB

Bakı, 9 fevral, AZƏRTAC

Türkiyədə zəlzələ nəticəsində həlak olanların sayı 17 min 134-ə, yaralananların sayı isə 70 min 347-yə çatıb.

AZƏRTAC xəbər verir ki, bu rəqəmləri Türkiyə Fövqəladə Halların İdarə Olunması Agentliyi (AFAD) açıqlayıb.

19:47

Türkiyədə zəlzələ nəticəsində indiyədək 16 min 546 nəfərin həlak olduğu, 66 min 132 nəfərin yaralandığı təsdiqlənib.

AZƏRTAC xəbər verir ki, bu rəqəmləri Türkiyə Prezidenti Rəcəb Tayyib Ərdoğan zəlzələ bölgəsinə səfəri zamanı Kilisdə açıqlayıb.

Türkiyənin son yüz ilin ən böyük təbii fəlakətlərindən biri ilə üz-üzə qaldığını vurğulayan Rəcəb Tayyib Ərdoğan türk xalqının yaranmış çətinliklərin öhdəsindən mətanətlə gələcəyinə əminliyini ifadə edib. Bildirib ki, dövlət heç bir vətəndaşını sahibsiz qoymayacaq.

Zəlzələ bölgəsində axtarış-xilasetmə əməliyyatları 4-cü gündür ki, fasiləsiz davam edir. Əməliyyatlarda Azərbaycan xilasediciləri də yaxından iştirak edirlər. FHN-dən verilən son məlumata görə, xilasedicilərimiz Kahramanmaraşda dağıntılar altından 9-u uşaq olmaqla 44 nəfəri sağ olaraq çıxarıb.

18:06

Türkiyədə zəlzələ nəticəsində həlak olanların sayı 16 min 170 nəfərə, yaralıların sayı 64 min 194 nəfərə çatıb.

AZƏRTAC xəbər verir ki, Türkiyə Prezidenti Rəcəb Tayyib Ərdoğan bu barədə zəlzələ bölgəsinə səfəri zamanı bildirib. Onun sözlərinə görə, bütün dövlət qurumları, bütün türk xalqı səfərbər olunub, ölkənin hər yerindən yardımlar gəlir.

Qeyd edək ki, zəlzələdən zərər çəkmiş 10 vilayətdə üç ay müddətinə fövqəladə vəziyyət rejiminin elan olunması qərarı bir qədər əvvəl Böyük Millət Məclisi tərəfindən təsdiqlənib.

14:45

Türkiyədə zəlzələ nəticəsində həlak olanların sayı 14 min 14 nəfərə çatıb, 63 min 794 nəfər yaralanıb.

AZƏRTAC xəbər verir ki, Türkiyə Prezidenti Rəcəb Tayyib Ərdoğan bu rəqəmləri zəlzələ bölgəsinə səfəri zamanı Qaziantepdə açıqlayıb.

Türkiyə Prezidenti bildirib ki, zəlzələdən zərər çəkmiş 10 vilayətdə üç ay müddətinə fövqəladə vəziyyət rejimi bu gün Böyük Millət Məclisində səsvermədən sonra qüvvəyə minəcək.

Rəcəb Tayyib Ərdoğanın Qaziantepdən sonra Osmaniyəyə və Kilisə gedəcəyi bildirilir.

Zəlzələ bölgəsində axtarış-xilasetmə əməliyyatları gecə-gündüz tam gücü ilə davam edir. Zəlzələnin 4-cü günü dağıntılar altından onlarla insan sağ çıxarılıb. Əməliyyatlarda 53 ölkədən 6 min 150 xilasedici iştirak edir. Azərbaycandan zəlzələ bölgəsinə FHN-in 725 nəfərlik şəxsi heyəti göndərilib.

10:59

Türkiyədə zəlzələ nəticəsində indiyədək 12 min 873 nəfərin həlak olduğu, 62 min 937 nəfərin yaralandığı təsdiqlənib.

AZƏRTAC xəbər verir ki, Türkiyə vaxtı ilə bu gün saat 7:45-ə olan son məlumat Fövqəladə Halların İdarə Olunması Agentliyi (AFAD) tərəfindən açıqlanıb.

Fevralın 6-da baş vermiş dağıdıcı zəlzələdən sonra 1117 afterşok qeydə alınıb. Zəlzələ bölgəsinə 113 mindən çox personal cəlb olunub. Axtarış-xilasetmə əməliyyatlarında 24 min 727 xilasedici iştirak edir. Xarici ölkələrdən 5 min 709 nəfər xilasedici gəlib. Zəlzələdən ən çox zərər çəkən 10 şəhərdə 92 min 738 çadır qurulub.

Qeyd edək ki, zəlzələdə yaralananların müalicəsi üçün Azərbaycanın tibb müəssisələrində 2 min çarpayı ayrılıb.

04:30

Türkiyədə zəlzələ nəticəsində həlak olanların sayı 12 min 391 nəfərə, yaralananların sayı isə 62 min 914 nəfərə çatıb.

AZƏRTAC TRT telekanalına istinadla xəbər verir ki, bu barədə məlumat Fövqəladə Halların İdarə Olunması Agentliyi (AFAD) tərəfindən açıqlanıb.

Xatırladaq ki, fevralın 6-da yerli vaxtla saat 04:17-də Türkiyənin Kahramanmaraş vilayətinin Pazarcık rayonunda 7,7 bal, saat 13:24-də isə Elbistan rayonunda 7,6 bal gücündə iki zəlzələ baş verib. Dərinliyi 7 kilometr olan zəlzələ 10 vilayətdə ciddi dağıntılara səbəb olub.