İƏT ölkələrinin nümayəndələri Ankarada qadın liderliyinin inkişafına töhfələri müzakirə edir
Ankara, 22 iyun, AZƏRTAC
Türkiyənin İslam Əməkdaşlıq Təşkilatının (İƏT) 51-ci Xarici İşlər Nazirləri Şurasına sədrliyi çərçivəsində təşkil edilən dördgünlük “Gələcək naminə müttəfiqlik – 2026” proqramı iyunun 22-də Ankarada başlayıb.
AZƏRTAC xəbər verir ki, Türkiyə Ailə və Sosial Xidmətlər Nazirliyinin himayəsi altında keçirilən tədbirdə İƏT-ə üzv olan 24 ölkənin nümayəndələri, qeyri-hökumət təşkilatlarının rəhbərləri, gənc fəallar, ekspertlər və alimlər iştirak ediblər.
Türkiyənin ailə və sosial xidmətlər naziri Mahinur Özdemir Göktaş da daxil olmaqla iştirakçılar qadın hüquq və azadlıqlarının, onların sosial inkişafının və cəmiyyətdəki imkanlarının qorunması yollarını müzakirə ediblər.
İslam dünyasının müxtəlif bölgələrindən olan gənc qadınları bir araya gətirməklə, fikir mübadiləsini təşviq etməklə və qadın liderlər arasında davamlı dialoq şəbəkələri yaratmaqla İƏT ölkələri arasında mədəniyyətlərarası qarşılıqlı əlaqənin gücləndirilməsinə xüsusi diqqət yetirilib.
Türkiyəli nazir Göktaş toplantıda çıxış edərək bildirib ki, qadınların cəmiyyətdəki rolunun gücləndirilməsi millətlərin sülh və rifahına töhfədir.
O əlavə edib: “Qadınlar Türkiyənin inkişaf proseslərində mühüm iştirakçılara çevriliblər. 2002-ci ildə qadın universitet tələbələrinin nisbəti 14 faiz idisə, 2025-ci ilə qədər bu rəqəm 53 faizə yüksəlib. Bu o deməkdir ki, qadınlar Türkiyə universitet tələbələrinin yarıdan çoxunu təşkil edir. Eynilə, 2002-ci ildə 36 faiz olan müəllim heyəti arasında qadınların nisbəti bu gün 53 faizə çatıb”.
Nazirin sözlərinə görə, Türkiyə Böyük Millət Məclisində qadınların nisbəti də artaraq ümumi sayın 19,8 faizini təşkil edib. Bundan əlavə, 2002-ci ildə 14 olan Türkiyədəki qadın səfirlərin sayı hazırda 82-yə yüksəlib.
Qeyd edək ki, “Gələcək naminə müttəfiqlik” seriyasının ilk İƏT proqramı 2017-ci ildə, sonrakı proqramı isə 2019-cu ildə təşkil edilib və İslam ölkələrindən olan gənc qadınlara təcrübə mübadiləsi aparmağa, əməkdaşlıq mədəniyyətini inkişaf etdirməyə, beynəlxalq əməkdaşlıq anlayışlarını formalaşdırmağa imkan verib. Bu, müsəlman qadınlar arasında liderlik keyfiyyətlərinin, ünsiyyət bacarıqlarının, diplomatiyanın və strateji düşüncə tərzinin inkişafına töhfədir.
Bölmənin digər xəbərləri
