MƏDƏNİYYƏT
VYANADA ÜZEYİR HACIBƏYOVUN ABİDƏSİNİN AÇILIŞ MƏRASİMİ OLMUŞDUR
Mərasimdə mədəniyyət və turizm naziri Əbülfəs Qarayev, respublikamızın bu ölkədəki səfirliyinin və diasporumuzun nümayəndələri, Avstriya Elm, Təhsil və Mədəniyyət Nazirliyinin əməkdaşları, Vyana Əyalət Parlamentinin sədri, professor xanım Ştumen Foll və Avstriyada fəaliyyət göstərən Azərbaycan və Türkiyə iş adamları iştirak etmişlər.
Azərbaycanın Avstriyadakı səfiri Fuad İsmayılov ümummilli lider Heydər Əliyevin təşəbbüsü ilə ölkələrimiz arasında yaranmış və hazırda dinamik inkişaf edən əlaqələrdən danışmışdır. Xanım Ştumen Foll görkəmli Avstriya bəstəkarı Motsartın vətənində Üzeyir Hacıbəyovun heykəlinin qoyulmasını ölkələrimiz arasında əməkdaşlığın yeni bir sahədə inkişafının təməli olduğunu bildirərək qeyd etmişdir ki, Ü.Hacıbəyovun “Arşın mal alan” əsəri Vyana operalarının birində yaxIn vaxtlarda səhnələşdiriləcəkdir.
Mədəniyyət və turizm naziri Əbülfəs Qarayev mədəniyyətimizə göstərilən diqqətə görə, Avstriya hökumətinə Azərbaycan Prezidenti İlham Əliyevin salamlarını və minnətdarlığını çatdırmışdır. Nazir Avstriya bəstəkarı Motsartın abidəsinin də Bakıda qoyulması barədə qərarın olduğunu diqqətə çatdırmış və ölkələrimiz arasında mədəni əlaqələrin daha da inkişaf edəcəyinə əminliyini vurğulamışdır.
Tədbirdə Azərbaycandan tədbirə dəvət olunmuş musiqiçilərin ifasında Üzeyir Hacibəyovun və Motsartın əsərlərindən nümunələr səslənmişdir.
Bölmənin digər xəbərləri
