Xocavənd, 12 iyul, Aydın Yavərzadə, AZƏRTAC

Vətən müharibəsində düşmənə qarşı son damla qanına qədər vuruşaraq şəhid olan Qara Balakişiyevin doğum günü məzarı yanında qeyd edilib. Şəhidin ailəsi ilə bərabər, rayon ictimaiyyəti, məktəblilər, ziyalılar onun xatirəsini ehtiramla anıblar.

AZƏRTAC-ın bölgə müxbiri xəbər verir ki, Qara yaşasaydı, 27 yaşını ailəsi və iki övladı ilə birgə qeyd edəcəkdi. İndi isə onun cənnətdəki ilk doğum günü məzarı üzərində qeyd olunur. Anım tədbirində şəhidin məzarı üzərinə gül dəstələri və çələnglər düzülüb, ruhuna dualar oxunub. Çıxış edənlər Vətən müharibəsində qazanılan Qələbədən söhbət açıblar. Bildirilib ki, Qara və digər qəhrəmanlarımız öz canlarını fəda edərək torpaqlarımızı yağı düşməndən azad etdi və 30 illik həsrətə son qoyuldu.

Qırx dörd günlük Zəfər yürüşünün qəhrəmanlarından olan Balakişiyev Qara Əmirxan oğlunun qısa, şərəfli ömür yolundan danışan şəhidin anası Nazimə Balakişiyeva deyir ki, Qara 1994-cü iyulun 11-də dünyaya göz açıb. O, hələ uşaq yaşlarından ata-baba yurdu haqqında maraqlanırdı. Erməni faşizmini başa düşdükcə düşmənə nifrət hissi ilə böyüdü. Atasının köhnə döyüşçü olduğunu bildiyi üçün Qara gələcəyin hərbçisi olmağı qarşısına məqsəd qoydu. O, hərbi xidməti bitirdikdən sonra öz istəyi ilə ordu sıralarında müddətdən artıq xidmətçi olaraq işə başladı. Onun arzusu yerinə yetdi, torpaqlarımız azad olundu, ordumuz bizlərə qələbə sevincini bəxş etdi. Zəfər yürüşündə Vətənin qəhrəman oğulları sinəsini düşmənə sipər edərək torpaqlarımızı yağı düşməndən azad etdi. İndi bütün şəhidlərimizin ruhu şaddır, onlar Azərbaycan tarixinin ən şanlı səhifəsində əbədi yaşayaraq gələcək nəsillər üçün örnək oldular.

Şəhid atası Əmirxan Balakişiyev deyir ki, Qaranın ilk döyüş yolu 2016-cı ilin Aprel zəfərindən başlayıb. Ermənilər üzərində qazanılan Qələbədə Qara və döyüşçü yoldaşlarının çox şücaətləri oldu. Onun ən böyük arzusu torpaqlarımızı azad görmək idi. 2020-ci ilin 27 sentyabrında ermənilər tərəfindən törədilən təxribata qarşı başlayan ordumuzun əks hücumunda Qara qəhrəmancasına döyüşdü. Gərgin döyüşlər zamanı düşmən tərəfindən Qaranın döyüş maşını vurulur və həmin zaman o, şəhidlik zirvəsinə ucalıb.

Şəhidin həyat yoldaşı Validə Balakişiyeva söyləyir ki, Qara Vətənini, hətta ailəsindən çox sevirdi və əziz tuturdu. Baxmayaraq ki, onun iki övladı var, söhbət Vətən olunca Qara bir an belə düşünmədən Vətənin harayına yollandı. İstər Aprel döyüşlərində, istərsə də Vətən müharibəsində Qara öz şücaəti ilə seçildi. Ömrünün 8 ilini Vətən keşiyində dayandı, son tapşırığını da Vətən uğrunda yerinə yetirərək ən uca məqama - şəhidlik zirvəsinə ucaldı.

Qeyd edək ki, Qara döyüşlərdə göstərdiyi şücaətə görə ölümündən sonra “Vətən uğrunda”, “İgidliyə görə”, “Füzulinin azad edilməsinə görə”, Cəbrayılın azad edilməsinə görə” medalları ilə təltif edilib.