ELM VƏ TƏHSİL
“XX əsr ədəbi düşüncələr tarixi” dərs vəsaiti nəşr olunub
Bakı, 21 iyun, AZƏRTAC
Azərbaycan Universitetinin professoru Asif Hacıyevin “XX əsr ədəbi düşüncələr tarixi” (xatirələr, manifestlər, konsepsiyalar) kitabı çapdan çıxıb.
Universitetdən AZƏRTAC-a bildiriblər ki, dərs vəsaiti kimi təqdim olunan kitabın redaktoru Azərbaycan dili və ədəbiyyat kafedrasının müdiri, dosent Ülviyyə Rəhimova, rəyçiləri isə professorlar Qorxmaz Quliyev və Şirindil Alışanovdur.
Kitabda XX əsrin son dərəcə rəngarəng, dinamik və mürəkkəb ədəbi düşüncələr tarixinə nəzər salınıb, XX əsr ədəbi prosesini səciyyələndirən ədəbi cərəyanlara aid manifestlər, konsepsiyalar, xatirələr və onların tərcüməsi təqdim edilib. Müxtəlif cərəyanlar üzrə qruplaşdırılmış bu mətnlərə əlavə olaraq hər bir cərəyan haqqında şərh və qeydlər də verilib.
Dərs vəsaitində, həmçinin dünyanın görkəmli şəxsiyyətləri - İlya Erenburq, Nikolay Trubetskoy, Nikolay Qumilyov, Salvador Dali, Umberto Eko, Jan Pol Sartr, Tomas Eliot və digər alim, filosof, yazıçı və ədəbiyyatşünasların məqalələrindən tərcümələr də yer alıb.
Kitab tələbələr, müəllimlər, tədqiqatçılar və ədəbiyyatsevərlər üçün nəzərdə tutulub.