® "Bakcell"dən Azərbaycan-Fransız Universitetində keçirilən beynəlxalq innovasiya müsabiqəsinə dəstək
Azərbaycanın ilk mobil operatoru və aparıcı mobil internet provayderi “Bakcell” şirkəti “ActInSpace 2018 Azerbaijan” beynəlxalq innovasiya müsabiqəsinə dəstək göstərib. 2014-cü ildən etibarən bütün dünyada təşkil olunan “ActInSpace” müsabiqəsi Azərbaycanda ilk dəfə olaraq Azərbaycan-Fransız Universiteti (UFAZ) tərəfindən keçirilib.
Kosmos proqramları sahəsində beynəlxalq nüfuza malik “ActInSpace” müsabiqəsi Milli Kosmik Tədqiqatlar Mərkəzi (CNES), Avropa Kosmik Agentliyi (ESA) və ESA BİC Sud France kimi təşkilatların iştirakı ilə dünyanın 40 ölkəsinin 70 şəhərində keçirilir. Dünyanın istənilən ölkəsindən gələn iştirakçılar üçün açıq olan bu müsabiqənin əsas məqsədi sahibkarlığın inkişaf etdirilməsi və proqram təminatı, verilənlər bazaları və kosmik infrastruktur sahəsində mövcud olan problemlərin həlli yollarının tapılmasıdır.
“ActInSpace 2018 Azerbaijan” UFAZ tərəfindən Fransanın Azərbaycandakı səfirliyi, “Bakcell” şirkəti, “IT STEP Academy” və “AIKON Constructions” şirkətinin sponsorluğu və dəstəyi ilə təşkil olunub. Bakının müxtəlif universitetlərindən olan 100-dən artıq tələbədən ibarət komandalar müsabiqədə iştirak etməklə CNES, ESA, Airbus və kosmik sənayedə fəaliyyət göstərən digər təşkilatlar tərəfindən qoyulmuş real həyat tapşırıqları üzərində çalışıblar. Komandalara kosmik texnologiyalar üçün istifadə olunacaq innovativ xidmət və məhsulları fikirləşib öz ideyalarını irəli sürmək üçün 24 saat vaxt verilib.
“AIS2018 Azerbaijan” müsabiqəsinin sponsorları və tərəfdaşlarının iştirakı ilə keçirilən mətbuat konfransında çıxış edən “Bakcell”in baş icraçı direktoru Nikolai Bekkers bildirib ki, şirkət gənc nəslin nümayəndələrin təşəbbüslərini və Azərbaycanda təhsilin inkişaf etdirməsi ilə bağlı layihələri dəstəkləməyə həmişə hazırdır: “İnnovasiyalar “Bakcell” şirkətinin fəaliyyətində həlledici rola malikdir. Bildiyiniz kimi, “Bakcell” ölkədə müxtəlif hakaton və startap layihələrin keçirilməsini dəstəkləyən ilk şirkətlərdən olmaqla yanaşı, özünün müasir startap inkubasiya mərkəzini yaradıb. Bizim əsas missiyamız Azərbaycanın gənc vətəndaşlarını maarifləndirmək və onlara inkişaf üçün stimul verməkdir. Bu baxımdan AIS təşəbbüsünə dəstək vermək imkanından çox məmnunuq. "Bakcell"i bu layihənin yerli tərəfdaşı qismində seçdiklərinə görə Fransanın Azərbaycandakı səfirliyinə və UFAZ-a öz dərin təşəkkürümüzü bildiririk. Biz əminik ki, mütəxəssislərimizin təcrübəsi və dəstəyi yarışma zamanı komandalar üçün olduqca faydalı olacaq”.
Xatırladaq ki, tələbələrin hazırladıqları startap layihələr ekspertlər tərəfindən qiymətləndirilib və iki layihə final mərhələsinə keçib. Qalib komanda Azərbaycan Dövlət Neft və Sənaye Universitetinin rektoru, professor Mustafa Babanlı, Strasburq Universitetinin rektoru Mişel Deneken, Fransanın Kosmik Tədqiqatlar Milli Mərkəzinin prezidenti Jan-Iv Lö Gol və “Azərkosmos” Açıq Səhmdar Cəmiyyətinin sədri Rəşad Nəbiyevdən ibarət münsiflər heyəti tərəfindən seçilib. UFAZ-ın 5 birinci kurs tələbəsindən ibarət “Sooners” komandası Azərbaycan üzrə birinci yerin, UFAZ-ın “Tensor Science” komandası isə ikinci yerin qalibi olub. Qalib komanda iyunun 27-si Azərbaycanı beynəlxalq final mərhələsində ilk dəfə olaraq təmsil etmək üçün Fransanın Tuluza şəhərinə göndəriləcək.
Qeyd edək ki, “ActInSpace 2018 Azerbaijan” müsabiqəsinin keçirilməsinə maliyyə dəstəyi göstərən “Bakcell”, həmçinin iştirakçıları texniki məsləhət və təlim dəstəyi ilə təmin edib. Belə ki, “Bakcell” şirkətinin “AppLab” inkubasiya proqramının ekspertləri və komanda üzvləri iştirakçılara startap layihələrinin hazırlanmasında kömək üçün texnologiya və biznes modeli kimi sahələr üzrə öz təcrübə və biliklərini bölüşüb.
İnnovasiya sahəsində lider olan “Bakcell” gənc nəslin nümayəndələrinə inkişaf imkanları, məsləhətlər və hətta innovativ ideyaların həyata keçirilməsi üçün tələb olunan dəstəyi göstərməyə hazırdır.
Bölmənin digər xəbərləri
