® “Azercell”in müştəri məmnuniyyəti göstəricisi son altı ayda 90 faizi keçib
Bu altı ay ərzində operatorun əlaqə mərkəzinə keçən ilin eyni dövrü ilə müqayisədə 10 dəfə artıq müraciət daxil olub
“Azercell Telekom” MMC 2020-ci ilin ilk yarısı üçün Əlaqə Mərkəzinə daxil olan müraciətlərin sayı və onların araşdırılması ilə bağlı nəticələri təqdim edib. Belə ki, cari ilin ilk 6 ayında “Azercell”in Əlaqə Mərkəzinə 2 milyon 300 min müraciət daxil olub ki, onların 2 milyon 210 mini və ya 96 faizi cavablandırılıb və müştərinin müraciəti üzrə məsələlər dərhal həllini tapıb. Aylar üzrə bu göstərici 90-98 faiz arasında dəyişib.
“Azercell”də cari ilin ilk yarısında xidmət səviyyəsinin göstəricisi ortalama 82 faiz təşkil edib ki, bu, müasir dövrdə Avropa standartlarına əsasən Çağrı mərkəzlərinin fəaliyyəti üçün yüksək nəticədir. Məlumat üçün bildirək ki, xidmət səviyyəsi - operatorun zəngi nə dərəcədə tez cavablandırması və müvafiq olaraq daxil olan müraciətin araşdırılması müddətinin qısalığını göstərir və mütləq şəkildə müştəri məmnuniyyətinə təsir etməklə yanaşı, təşkilatın imici üçün də əhəmiyyət kəsb edir. Həmçinin Avropa standartlarına görə müştəri məmnuniyyəti göstəricisi 80 faizdən yuxarı olmalıdır ki, son altı ayda “Azercell”də bu göstərici 90 faizdən artıq təşkil edib.
5 milyonluq abunəçi ailəsinin rahatlığını təmin edən “Azercell”, ilk növbədə, müasir iş və yaşayış şəraitini nəzərə alaraq abunəçilərinin müraciətlərini yeni platformalarda onlayn qaydada cavablandırır. Belə ki, 2019-cu ilin son rübündən etibarən “Azercell”in onlayn müştəri xidmətləri sahəsində cavab platformalarının sayı dəfələrlə artırılıb. “Kabinetim” tətbiqetməsinə çat bölməsi əlavə olunub ki, proqrama daxil olan müştərilər birbaşa bu çatda müraciətlərini çatdıra bilirlər, eyni zamanda, “Play Market” və “AppStore” üzərindən abunəçilərin tətbiqlə bağlı rəy bildirmək və suallara cavab almaq imkanı da işə salınıb. Ötən ilin noyabrından etibarən online xidmət 24/7 iş rejiminə keçib, “facebook”da müştərilərin müraciətləri fərdi çatda birbaşa qəbul edilməyə başlayıb. Bununla yanaşı, 2020-ci ilin əvvəlində “Azercell” onlayn müştəri xidmətləri sahəsində yenilikləri təqdim edib, belə ki, abunəçilər arasında populyarlaşan yeni “Telegram” sosial şəbəkədə “Azercell Bot” yaradılıb və uğurla tətbiq olunur.
Rəqəmlərə gəldikdə, cari ilin ilk 6 ayında ötən ilin müvafiq dövrü ilə müqayisədə “Azercell”ə daxil olan onlayn müraciətlərin sayı təxminən 10 dəfə artıq olub. 2019-cu ilin ilk yarısında “Online Çat” vasitəsilə şirkətə 23 mindən yuxarı müraciət daxil olmuşdusa, bu il üçün bu göstərici 208 mindən çox olub. Keçən ilin dekabrında fəaliyyətə başlayan “facebook” üzərindən fərdi çat sayəsində təkcə 6 ay ərzində 23 min 743 müraciətə baxılıb. Eyni zamanda, elektron poçt vasitəsilə daxil olan və cavablandırılan müraciətlərin sayı da artıb. Bu ilin 6 ayında elektron poçtla daxil olan 5538 məktubun hamısı cavablandırılıb. Bundan əlavə, korporativ müştərilər üçün Telefon Mərkəzi ilk 6 ay ərzində 49 min zəng və 16 min onlayn müraciət qəbul edib, “Premium” statuslu müştərilər üçün fəaliyyət göstərən xüsusi Telefon Mərkəzi isə 55 min zəng qəbul edib. Beləliklə, 2020-ci ilin ilk yarısında “Azercell”in Əlaqə Mərkəzi kanalları vasitəsilə 2 milyondan artıq müraciət cavablandırılıb.
Xüsusi olaraq qeyd edilməlidir ki, son aylar ölkəmizdə pandemiya ilə əlaqədar elan edilmiş karantin rejimi səbəbindən “Azercell” şirkətinin Əlaqə mərkəzi gücləndirilmiş iş rejimində çalışır. İşçilər üçün dərhal evdən işləmə şəraiti yaradılıb. Karantin rejimini nəzərə alaraq “Azercell Telekom” öz abunəçilərinə evi tərk etməməsi və insan sıxlığı olan yerlərə getməməsi üçün distant xidmət kanallarından istifadəni tövsiyə edib.
Qeyd edək ki, Azərbaycanda mobil rabitə bazarının lideri, 5 milyon vətəndaşın seçimi olan “Azercell Telekom” MMC hər zaman müştərilərinin rahatlığını düşünür və daim müştəri xidmətləri sistemlərinin ən qabaqcıl və innovativ modellərinin təkmilləşdirilməsi və tətbiqi üçün çalışır.
Daha ətraflı məlumat üçün “[email protected]” ünvanına müraciət edə bilərsiniz.
Bölmənin digər xəbərləri
