"Qəbələ"-"PAOK" görüşündə hesab açılmayıb
Bakı, 18 sentyabr, AZƏRTAC
Futbol üzrə UEFA Avropa Liqası yarışlarının qrup mərhələsinin ilk turunda Azərbaycanı təmsil edən "Qəbələ" komandası sentyabrın 17-də Bakıda Yunanıstanın "PAOK" klubunu qəbul edib.
AZƏRTAC xəbər verir ki, "Bakcell Arena"da keçirilən oyunda "Qəbələ"nin start heyətində Dmitri Bezotosnı, Vojislav Stankoviç, Rikardo Ferreyra da Silva, Arif Daşdəmirov, Vitali Vernydub, Aleksey Qay, Sergey Zenyov, Dodo, David Meza Kolli, Ermin Zets və Aleksey Antonov meydana çıxıblar.
Qarşılıqlı hücumlar şəraitində keçən matçın ilk hissəsində hər iki komandanın hesabı açmaq üçün imkanları olsa da, qapılara qol vurulmayıb.
Əvvəlcə 12-ci dəqiqədə Rikardo Ferreyra da Silva ("Qəbələ") hesabı açmaq imkanını əldən verib. Onun sol cinahdan rəqib qapıya vurduğu zərbəni "PAOK"un qapıçısı Robin Olsen dəf edib. 24-cü dəqiqədə Dodo və bir dəqiqə sonra A.Antonovun cərimə zərbələrindən vurduqları toplar qapıdan yan keçib.
İkinci hissədə daha sürətli oyun sərgiləyən komandalar qapılar qarşısında təhlükəli vəziyyətlər yaradıblar. Görüşün 68-ci dəqiqəsində S.Zenyovun sol cinahdan ötürməsini və A.Qayın 72-ci dəqiqədə zərbəsini Yunanıstan komandasının qapıçısı çətinliklə də olsa dəf edib.
Sonradan komandamızın heyətində E.Zetsin əvəzinə oyuna daxil olan argentinalı hücumçu Fakundo Abel Pereyra bir neçə dəfə qol vurmaq imkanı əldə etsə də, o, bunlardan istifadə edə bilmir.
Görüşün son dəqiqələrində künc zərbəsindən sonra A.Antonovun başla endirdiyi zərbə isə dəqiq alınmır.
Beləliklə, Avroliqa yarışlarının qrup mərhələsinin birinci qarşılaşmasından heç-heçə ilə ayrılan Roman Qriqorçukun komandası bu turda ilk xalını qazanıb.
Matçı izləmək üçün stadiona gələn çoxlu sayda azarkeş komandamızı fəal dəstəkləyib.
Görüşü ispaniyalı baş hakim Xavyer Estrada idarə edib. Köməkçi hakim funksiyasını onun həmyerliləri Miqel Martines, Teodoro Sobrino və Dieqo Barbero Sevilla yerinə yetiriblər.
Avroliqanın "C" qrupunda mübarizə aparan Azərbaycan çempionatının bürünc mükafatçısı bu mərhələdə, həmçinin "Borussiya" (Dortmund, Almaniya) və "Krasnodar" (Rusiya) kollektivləri ilə qarşılaşacaq.
Qruplarda ilk iki sırada yer alan komandalar növbəti mərhələyə yüksələcək.
Komandamız növbəti matçını oktyabrın 1-də səfərdə Rusiyanın "Krasnodar" klubuna qarşı keçirəcək.
Almaniyada keçirilən qrupun digər oyununda "Borussiya" (Dortmund) klubu "Krasnodar" (Rusiya) komandasına 2:1 hesabı ilə qalib gəlib.
Xatırladaq ki, Azərbaycan təmsilçisi Avroliqa turnirində Gürcüstanın "Dinamo", Serbiyanın "Çukariçki", Kiprin "Apollon" və Yunanıstanın "Panatinaikos" klublarını mübarizədən kənarlaşdıraraq tarixində ilk dəfə olaraq yarışların qrup mərhələsinə vəsiqə qazanıb.
Bölmənin digər xəbərləri
