ABB AZƏRBAYCAN ENERGETİKASININ BƏRPASINDA FƏAL İŞTİRAK EDİR
Dünyanın şöhrətli ABB şirkətinin Almaniyadakı şöbəsi “Azərenerji”nin mütəxəssisləri üçün öz layihələrinin təqdimatını keçirmişdir. Ölkənin baş enerji idarəsinin mətbuat xidmətindən AZƏRTAC-ın müxbirinə bildirmişlər ki, mərasimdə SCADA dispetçer idarəetmə sisteminin tətbiqi və ötürücü infrastrukturun bərpası layihəsi təqdim edilmişdir. Azərbaycanın ötürücü sisteminin bərpası proqramı üçün Almaniyanın KFW bankının ayırdığı kredit də diqqət mərkəzində olmuşdur. Bu layihə çərçivəsində bir sıra yüksəkgərginlikli yarımstansiyaların yenidən qurulması nəzərdə tutulur. Dispetçer mərkəzinin yenidən qurulması energetika sisteminin operativliyini xeyli yüksəltməyə imkan verəcək, bu da onun etibarlılığını artıracaqdır. ABB şirkəti dünyanın ən iri elektrotexnika avadanlığı istehsalçılarından biridir. O, həm də dispetçer idarəetmə sistemlərinin tətbiqi və elektrik stansiyalarının tikintisi sahəsində ixtisaslaşır. Şirkət Azərbaycanda 1995-ci ildən fəaliyyət göstərir və respublikanın energetika kompleksinin müxtəlif idarələri ilə əməkdaşlıq edir.
Bölmənin digər xəbərləri
