Abituriyentlər aprelin 11-dən mayın 31-dək sənəd qəbulu komissiyalarında (SQK) “Elektron ərizə”lərini təsdiq etdirməlidirlər

2008/2009-cu tədris ili üçün ölkənin ali məktəblərinə və orta təhsil bazasından orta ixtisas məktəblərinə keçiriləcək qəbul imtahanlarında iştirak etmək üçün “Elektron ərizə” dolduran abituriyentlər tələb olunan sənədləri təqdim edərək ərizələrini aprelin 11-dən mayın 31-dək müvafiq SQK-larda təsdiq etdirməlidirlər. SQK-lar hər gün (bayram və bazar günləri istisna olmaqla) saat 9-dan 17-dək fəaliyyət göstərəcəkdir.

Bakıdakı orta ümumtəhsil məktəblərini 2008-ci ildə bitirən abituriyentlər ərizələrini aşağıdakı məktəblərdə fəaliyyət göstərən SQK-larda təsdiq etdirirlər:

- Binəqədi rayonu (83; 246; 29 nömrəli məktəblər),

- Xətai rayonu (95; 55; 249),

- Nəsimi rayonu (19;46),

- Səbail rayonu (190; 49),

- Sabunçu rayonu (107;75),

- Qaradağ rayonu (139),

- Əzizbəyov rayonu (183),

- Nizami rayonu (210; 250),

- Nərimanov rayonu (47; 178),

- Yasamal rayonu (158; 225),

- Suraxanı rayonu (85; 104).

Respublikanın digər şəhər və rayonlarında orta təhsil məktəblərini bitirmiş abituriyentlər ərizələrini təhsil şöbələrində və telekommunikasiya qovşaqlarında yaradılmış SQK-larda təsdiq etdirəcəklər.

Ali, orta ixtisas, peşə məktəblərini 2008-ci ildə bitirən məzunlar və orta ümumtəhsil məktəblərini əvvəlki illərdə bitirmiş abituriyentlər ərizələrini aşağıdakı ali təhsil müəssisələrində yaradılmış SQK-larda təsdiq edirəcəklər:

- Azərbaycan Texniki Universiteti;

- Azərbaycan Dövlət Pedaqoji Universiteti;

- Azərbaycan Memarlıq və İnşaat Universiteti;

- Azərbaycan Dillər Universiteti;

- Azərbaycan Turizm İnstitutu;

- Xəzər Universiteti;

- “Azərbaycan” Universiteti;

- Bakı Biznes Universiteti;

- Azərbaycan Kənd Təsərrüfatı Akademiyası;

- Gəncə Dövlət Universiteti;

- Azərbaycan Texnologiya Universiteti;

- Naxçıvan Dövlət Universiteti;

- TQDK-nın Naxçıvan MR regional şöbəsi;

- Sumqayıt Dövlət Universiteti;

- Azərbaycan Müəllimlər İnstitutunun Sumqayıt filialı;

- Lənkəran Dövlət Universiteti;

- Mingəçevir Politexnik İnstitutu;

- Azərbaycan Müəllimlər İnstitutunun Mingəçevir, Şəki, Qazax, Ağcabədi, Cəlilabad, Quba, Salyan, Şamaxı, Zaqatala filialları.

16 yaşı 2008-ci il aprelin 30-dək tamam olmayan şəxslər tələb olunan sənədləri aprelin 11-dən mayın 31-dək aşağıdakı SQK-lara təqdim etməklə “TQDK-nın ödəmə kartı”nı və uyğun iş nömrəli “Abituriyentin ərizəsi”nin kağız formasını alır və şəxsən doldururlar:

Azərbaycan Müəllimlər İnstitutu (Bakı ş., K.Rəhimov küçəsi, 874-cü məhəllə);

TQDK-nın Naxçıvan MR regional şöbəsi (Naxçıvan ş., Nizami küçəsi, 10, Rabitə və İnformasiya Texnologiyaları Nazirliyinin yanı);

Gəncə Şəhər Təhsil Şöbəsi (Gəncə ş., 6 saylı orta məktəb. H.Hüseynzadə küçəsi, 36, tel.: (022) 564478).

Xarici dövlətlərin vətəndaşları tələb olunan sənədləri aprelin 11-dən mayın 31-dək TQDK-da yaradılmış SQK-ya təqdim etməklə “TQDK-nın ödəmə kartı”nı və uyğun iş nömrəli “Abituriyentin ərizəsi”nin kağız formasını alır və şəxsən doldururlar.

Gürcüstan vətəndaşları olan azərbaycanlılar sənədlərini Qazax Rayon Təhsil Şöbəsində, Rusiya Federasiyasının Dağıstan Respublikasında yaşayan azərbaycanlılar isə Qusar Rayon Təhsil Şöbəsində yaradılmış SQK-ya təqdim edə bilərlər.

Xüsusi təyinatlı ali təhsil müəssisələrinə daxil olmaq istəyən abituriyentlər isə sənədlərini müvafiq nazirlik və idarələrin müəyyənləşdirdiyi qaydalara əsasən təqdim etməlidirlər.

Abituriyentlər ərizələrini təsdiq etdirmək üçün SQK-ya aşağıdakı sənədləri təqdim etməlidirlər:

- orta və ya ali təhsili haqqında sənədi:

a) əvvəlki illərin məzunları sənədin əslini;

b) cari ilin məzunları müəyyən edilmiş formada, təhsil müəssisəsi tərəfindən verilən və abituriyentlərin buraxılış sinfində oxuduqlarını təsdiq edən arayışı (16 yaşı 2008-ci il aprelin 30-dək tamam olmayan abituriyentlərə verilən arayışa abituriyentin 3x4 sm ölçüdə şəkli yapışdırılır və şəkil möhürlə təsdiqlənir);

- şəxsiyyəti təsdiq edən sənədin əslini:

a) Azərbaycan Respublikasının vətəndaşları şəxsiyyət vəsiqəsini;

b) 16 yaşı 2008-ci il aprelin 30-dək tamam olmayan şəxslər doğum haqqında şəhadətnaməni;

c) xarici dövlətlərin vətəndaşları milli pasportunu və ya Azərbaycan Respublikasında qeydiyyat haqqında vəsiqəsini;

- hərbi bilet və ya çağırışçı şəhadətnaməsini.

- 16 yaşı 2008-ci il aprelin 30-dək tamam olmayan şəxslər və xarici dövlətlərin vətəndaşları yuxarıda qeyd olunan sənədlərdən əlavə 2 ədəd yeni çəkilmiş, 3x4 sm ölçüdə olan eyni fotoşəkli;

- xarici dövlətlərin vətəndaşları yuxarıda qeyd olunan sənədlərlə yanaşı, onların notarial qaydada təsdiq edilmiş Azərbaycan dilinə tərcüməsini.

1973-1990-cı il təvəllüdlü (1990-cı il iyulun 30-na qədər anadan olmuş) 35 yaşınadək olan gənclərin möhlət haqqında arayışı və hərbi sənədlərində bu barədə Azərbaycan Respublikası Hərbi Komissarlığının qeydiyyatı olmalıdır. Hərbi qeydiyyatın aparılması Azərbaycan Respublikası Hərbi Komissarlığının mövcud qaydaları ilə tənzimlənir.

Orta ümumtəhsil məktəblərinin 2008-ci il məzunlarından möhlət haqqında arayış tələb olunmur.

Müstəqil Dövlətlər Birliyinə daxil olan dövlətlərin çağırış yaşlı vətəndaşlarının hərbi sənədlərində müvafiq qeydiyyat onların daimi yaşayış yerlərinin hərbi komissarlıqları tərəfindən aparılır.

Ali və orta ixtisas məktəblərinin xüsusi qabiliyyət tələb edən ixtisaslarında təhsil almaq istəyən abituriyentlər test imtahanından əlavə xüsusi qabiliyyət imtahanı verməlidirlər.

Xüsusi qabiliyyət imtahanlarında iştirak etmək üçün abituriyent ərizəsini ümumi qaydaya əsasən təsdiq etdirəndən sonra TQDK tərəfindən yaradılmış müvafiq Qabiliyyət İmtahanı Komissiyasında (QİK) qeydiyyatdan keçməlidir.

Qeydiyyata alınmaq üçün kino, teatr və xoreoqrafiya sənəti üzrə təhsil almaq istəyən abituriyent aprelin 11-dən mayın 31-dək, xüsusi qabiliyyət tələb edən digər ixtisaslar üzrə təhsil almaq istəyən abituriyent isə mayın 1-dən 31-dək QİK-ə tələb olunan sənədləri və yaradıcılıq fəaliyyətinə dair işləri təqdim edir. QİK-də abituriyentin təhsil almaq istədiyi ixtisasa yararlılığı yoxlanılır və qeydiyyata alınır. Qeydiyyata alınmış abituriyent qabiliyyət imtahanlarının cədvəlini götürür və iyunun 28-dən iyulun 7-dək cədvəl üzrə qabiliyyət imtahanları verir.

Ali məktəblərə və orta təhsil bazasından (11 illik) orta ixtisas məktəblərinə ərizə qəbulu barədə əlavə məlumatları “Abituriyent jurnalı”nın 2-ci sayından və www.tqdk.gov.az internet saytından əldə etmək olar.

######