ABŞ Bavariyanın Vilsek şəhərindəki hərbi bazadan 5 min hərbçisini çıxarır

04.05.2026 [17:29]
Çap et
A⁺ A^-

Berlin, 4 may, AZƏRTAC

Amerika Birləşmiş Ştatlarının (ABŞ) ordusu Almaniyanın Bavariya əyalətinin Vilsek şəhərindəki “Stryker” briqadasının 5 min hərbçisini çıxarmağı planlaşdırır.

AZƏRTAC Almaniya mediasına istinadla xəbər verir ki, bu hərbi birlik Qrafenvoehr təlim bazasının hərbi təlim poliqonunda xidmət aparır. Hərbçilər çıxarılsa da, baza bağlanmayacaq və azı 8 min əsgər burada qalacaq.

Vilsek şəhərinin meri qoşunların çıxarılmasının yerli icma üçün iqtisadi baxımdan ciddi zərbə ola biləcəyini qeyd edib.

Xatırladaq ki, ABŞ-nin Prezidenti Donald Tramp Almaniya Kansleri Fridrix Mertsin Birləşmiş Ştatların İrana qarşı hərbi əməliyyatları ilə bağlı tənqidi açıqlamalarına cavab olaraq Almaniyadan 5 mindən çox hərbçinin çıxarılacağını bəyan edib. Eyni zamanda, Almaniyada “Tomahawk” qanadlı raketlərinin yerləşdirilməsi planının da dayandırılması ehtimal olunur.

Hazırda Almaniyada ABŞ-nin bir neçə böyük hərbi bazası var. Bu bazalarda ümumilikdə 40 minə yaxın əsgər yerləşdirilib.

_{Elvin Mövsüm}

_{AZƏRTAC-ın xüsusi müxbiri}

_Berlin