ABŞ-da 911 nömrəsi ilə sms-məlumatlar və videoxəbərlər qəbul ediləcəkdir
Bakı, 25 noyabr (AZƏRTAC). AZƏRTAC xəbər verir ki, 911 nömrəsi ilə ABŞ-da fəaliyyət göstərən təcili xidmət mərkəzlərindən sms-məlumatlar və videoxəbərlər qəbul etmək mümkün olacaqdır. Hökumət 911 təcili xidmət telefonunun servis imkanlarını genişləndirmək üçün əməli addımlar atmaq niyyətindədir. Belə ki, vətəndaşlar həmin nömrə ilə təkcə səsli zənglər yox, eyni zamanda sms-məlumatlar, mobil telefondan göndərilən videoxəbərlər axını ilə cinayətlər, fövqəladə vəziyyət barədə məlumatlar da verə biləcək, təcili yardım, polis və ya yanğınsöndürənlər çağırmaq imkanı qazanacaqlar.
911 xidməti 1968-ci ildə təsis olunmuşdur. Hazırda həl il 230 milyon zəng qəbul edilir. Həmin zənglərin 70 faizi mobil telefonların payına düşür. ABŞ Federal Rabitə Komissiyası (FCC) 911-i axırıncı dəfə 2011-ci ildə “yeniləşdirmişdir”. Belə ki, həmin vaxt mobil rabitə operatorlarına təcili xidmətlərə abonentlərin yerini GPS və ya onların qüllələrindən ötürülən məlumatlar vasitəsi ilə müəyyənləşdirməyə icazə vermək tapşırılmışdı.
Bununla belə, 911 əvvəlki kimi yenə də yazılı, multimedia məlumatlarını, habelə videoxəbərlər axınını qəbul etmir. Halbuki, onlar təcili reaksiya verilməsi üçün faydalı ola bilər. CNN-nin məlumatına görə, 911-in texniki imkanlarının məhdud olması faciəvi nəticələrə gətirib çıxara bilər.
Bölmənin digər xəbərləri
