ABŞ-DA GÜNƏŞ BATAREYALARI İLƏ İŞLƏYƏN AVTOMOBİLLƏRİN QAÇIŞI
AZƏRTAC İTAR-TASS agentliyinə istinadla xəbər verir ki, ABŞ-da “Ameriken solar çellenc” avtomobil qaçışı başlanmışdır. Onun təşkilatçıları ictimaiyyətin diqqətini planetimizin kövrək ekologiyasına və bərpa edilən enerji mənbələrindən istifadə zərurətinə cəlb etmək istəyirlər. Avtoqaçışda mvhərrikləri ancaq günəş enerjisi ilə işləyən 30 maşın iştirak edir. Üzərində günəş batareyaları hissələri olan parlaq rəngli qəribə yastı aparatlar, əsasən, ABŞ, habelə Kanada və Böyük Britaniya universitetlərinin elmi tədqiqat mərkəzlərində hazırlanmışdır. Çikaqoda başlanmiş avtoqaçış 3,7 min kilometr yol qət edərək, iyulun 23-də Los-Ancelesdə başa çatacaqdır. Qaçış dörd mərhələyə bölünmüşdür. Mərhələlərin cəminə görə ən yaxşı vaxt göstərən komanda qalib hesab olunacaqdır. Yarış Amerikanın qərbdən şərqə kəsib keçən məşhur avtomobil yolunda keçiriləcəkdir. Günəş batareyalarının hasil etdiyi enerji şosedə yol verilən sürətin təmin olunmasına, bəzən isə qarşıdan gələn maşın axınına mane olmamaqla, sürəti artırmağa imkan verəcəkdir.
Bölmənin digər xəbərləri
